容祖兒嘅紅館演唱會已進入倒數階段，前晚第16場特別嘉賓係每晚都會幫手做調音師嘅張敬軒，祖兒唱《黃色大門》介紹軒仔出場。佢哋吹水時，軒仔大爆祖兒幕後辛酸史：「凌晨完騷，喉嚨仲插住六支針，就係為咗保證第二日有一個最好狀態見大家。」聽軒仔講完，祖兒一時感觸落淚，台下歌迷安慰偶像，軒仔就上前抱抱，佢非常肉赤祖兒要一個人承擔所有問題。
珍惜朋友緣份
之後祖兒提出報答方法：「如果你需要一個人，將來識唔到一個女朋友都好，我可以做『代母』，喺泰國捐精，哈哈哈。」觀眾捧腹大笑，軒仔就被祖兒嚇窒：「咁我泰國搵得啦。」祖兒叉腰反問：「做咩？𠵱家我好失禮你咩？我差啲乜？」軒仔讚祖兒基因好，不過笑住話：「我覺得呢世，珍惜做朋友緣份就夠，第時我去你屋企，我應該叫你媽咪、外母好，定auntie好？有單身男士，真係可以上Ig留言畀祖兒。」
祖兒雖然無奈，軒仔繼續話：「容祖兒真係乜嘢都有，身邊人嘅愛都有，就係差一頭好人家。」祖兒搞笑回應：「一炷香係咪？」之後佢哋再合唱《櫻花樹下》。觀眾大叫「安哥」留住軒仔，而佢亦早有準備，即場變身惡搞祖兒嘅「火龍果」，再合唱《Pretty Hungry》。
撰文：馮仁昭