那些年，位於英皇道的皇都戲院，是北角地標，見證港產片盛世。可惜物換星移，如非被評級為一級建築，再加大財團收購，掀起一陣保育評級，新一代或不知那個十室九空的老舊商場，前身是盛極一時的老戲院。「1976年，許氏兄弟套《半斤八両》，破盡票房紀錄，就喺呢度上映，可惜嗰時屋企太窮，睇戲太奢侈」。錯過了的美好光影，60後的陳鴻輝，就用一雙巧手，重塑記憶中的流金歲月。翻查建築圖，遍尋老照片，與支持自己尋夢的太太，同往早變了商場的戲院原址，來個拍拖兼實地考察……既是電影迷，又是微縮模型手作人的輝哥說：那些年的香港，快樂好簡單。
撰文：呂麗嬋
攝影：張志華
「媽咪同你爸爸，就喺呢度第一次睇戲！」帶着小朋友到來參觀展覽的中年媽媽，較孩子更興奮。這個暑假，輝哥的最新微型創作，在商場展出。除了「皇都戲院」，由另一藝術家李來有巧手重塑的，還包括《秋天的童話》的經典一幕：船頭尺再遇十三妹，那一句言在意外的「table for two？」是一代人的浪漫回憶。還有《黃飛鴻》和《歲月神偷》，都是不同年代陪伴香港人成長的經典。「以前皇都好巴閉，可惜細個屋企窮，從來無機會去」。長大了，終於有錢買戲票，老戲院卻於九七主權移交的同一年，宣佈結業，夢難圓，就以皇都為藍本，重塑他心中的光影故事。
「做情景模型，最嘥時間唔係整，而係資料搜集，戲院雖轉做商場，但最基本嘅建築結構仲喺度」。簡潔的拱橋式「龍骨」屋頂，獨一無二，他還認真到找來大樓的建築圖，了解結構比例，一絲不苟。「只搵到2000年嘅建築圖，要重塑1976年的面貌係有難度，畢竟經過多次改動，大廈嘅外貌同舖頭都唔同晒」。翻查大量黑白老照片，加上實地考察，輝哥笑謂重塑香港，要有考古精神。「嗰個年代，戲院外總有街邊檔賣蔗，《半斤八両》冬天上映，天氣好凍，印象中啲蔗放喺大鐵桶，下面有個火，但搵唔到相印證，惟有整住賣魚蛋燒賣涼果嘅小攤先……」
用廢物展現第二生命
除了熟食小檔，戲院外的唱片舖、老式髮廊，還有照相館，一樣有來歷。「真係對住啲舊相放大研究，不過喺真實基礎之下都會加啲創作，70年代唔似今日咁多娛樂，啲人睇戲，除咗會買嘢食，仲會做啲乜？」如是者，在他的作品中，婚紗攝影公司外，是一男一女拖着手在看櫥窗；又有心急人叉腰睇錶，想必是開場在即，等的人遲到了吧？還有坐在欄杆撩女仔的飛仔，以及穿迷你裙和喇叭褲的時尚女孩，充滿小情小趣，逼真得猶如一張立體的相片。
由於製作細緻認真，陳鴻輝的微型作品，過去就多次獲邀到不同國家展出，就連以細緻見稱的日本人也嘖嘖稱奇，吸引當地有電視台節目推介，成了認識老香港的一扇窗口。「去東京展覽，有啲日本人留言話從無諗過，以前嘅香港原來係咁」。輝哥說。一張巧手，變出昔日香港千般美，但走進他那位於火炭的小小工作室，卻原來所用的工具，只是十元八塊的小刀小鉗小號畫筆，甚至連調色盤都欠奉，只由幾張白紙代替。「就係一般勞作用具，調油我用牙籤」。這也難怪，輝哥說小時候屋企很窮，總自己造玩具，習慣廢物利用，隨手拈來，汽水蓋、封箱膠布，都可賦予第二生命。另如剝落的牆身、斑駁的窗花，就用廚房海綿點顏料，製造「舊化」效果。
無師自通 砌出真實回憶
1952年落成的皇都戲院，有67年歷史，前身為璇宮戲院，是香港碩果僅存的單幢式戲院建築，獨特的屋頂設計，在亞洲更是獨一無二，見證港產片黃金時代，也見證時年十七的歌后鄧麗君走紅。「60年代係黑白嘅世界，70年代就係彩色嘅世界，好浮誇，大鳴大放，就連衣着都係五顏六色，喇叭褲、關刀領……」小時候家住東頭邨，爸爸就在黃大仙開五金舖，四兄弟姐妹之中排第三的陳鴻輝，直言讀書不叻，中學讀職業先修學機械金工，畢業後做了十幾年開鎖，為口奔馳，從無想過可以擁有自己的模型公司，還能以創作者的身份，有機會到外國參加展覽。
「細個係好鍾意畫畫，手工特別叻，但無諗過可以做職業，讀完職業先修就幫人開鎖，做咗好多年嘢，先叫有啲時間同閒情砌吓模型」。那想到，人到中年，重燃心中一團火，別人愛砌預製組件的模型，他就愛由一塊膠片，由零開始。「可能因為細個屋企窮，習慣自己整玩具吧？睇吓書，自己落刀試吓就OK，無人教我，我又唔識教人，都係摸索番嚟」。說來簡單，但其實他的首個作品「回憶徙置區」，就足足造了三年：「以前住七層大廈，呢啲都係真實的童年回憶」。
小孩子沖涼、主婦在煮飯，甚至有他的影子……那些年，所有活動都在走廊進行，反映庶民百態的微縮模型中，還包括他自己！「細個讀書麻麻哋，一年兩次派成績表，一定俾阿媽藤條炆豬肉」。他手指指笑說。作品放上網獲欣賞，應邀參加不同展覽，一雙巧手，誤打誤撞，成就了人生下半場，由小時候住過的徙置區、少年時代想去但從無去過的皇都戲院，到他喜歡的大澳水鄉，動輒花上數月，甚至數年，他笑說慢工是否出到細貨很難說，但至少享受過程。
「砌模型係一件開心嘅事，慢慢嚟就好，好似皇都戲院，如果遲啲可以搵到相印證，就加多個賣蔗小販上去」。重塑回憶中的香港，重塑那些年的美好價值，建造香港2.0，有何不可？陳鴻輝最新作品以至另外3個由不同藝術家，以經典電影場景為藍本的微型創作，由即日起至9月1日在圓方金區展出。