何韻詩近月來都參與遊行集會，上月仲去咗瑞士日內瓦出席聯合國人權理事會例會，講解香港人權狀況。前日阿詩就飛到美國三藩市出席講座，佢噚日喺社交網帖文，報告已經完成演講，正喺返港嘅飛機上。今次演講除咗有關人權問題外，佢仲講咗「連登」點樣喺呢場運動上發揮作用，港人冇大台、冇領袖，一齊為民主行咗兩個幾月。
掌聲歸港人
阿詩喺留言度講笑話因為時差問題，暈暈哋講talk，英語仲講到一嚿嚿，佢留言：「成功用英文講到L-I-H-K-G，但又喺好wing嘅頭腦下某啲位嘅英文講到19999，唉。但台下觀眾好包容，好專心聽每一個細節，我感覺到，佢哋真係好留意香港最近嘅事。」現場人士反應熱烈，仲畀咗好多掌聲，阿詩話呢啲掌聲係畀所有正在抗爭嘅香港人：「其實一行出去已經好大掌聲，每次講到香港人點點點，一百萬人、兩百萬人，都會得到歡呼（呢啲summit啲人一般都極冷靜），最後更全場standing ovation。唔好誤會，我係冇誤會㗎，我知道全部全部掌聲都係畀香港人，亦因此感到無比驕傲，因為全世界都為香港人過去兩個幾月而感到震撼、感動。最後我話，如果香港小小一個七百萬人嘅城市都可以走到呢度，其實世界上每個地方都可以。而我真心相信，我哋確實喺度改變緊世界。」
最後，阿詩表明未來兩個月將會繼續去五、六個地方，將香港人嘅勇氣帶到各地觀眾面前，佢留言：「香港人，我哋繼續加油。」
撰文：馮仁昭