現年71歲的溫柳媚（柳姐）於1975年加入無綫，當年她憑樣子美艷，參演王牌節目《歡樂今宵》，拍過《少年十五二十時》、《小李飛刀之魔劍俠情》及《絕代雙驕》等劇集，可惜1979年坐朋友駕駛的跑車發生意外，柳姐頭部爆裂，接受六次腦部手術，退出演藝圈後曾陷財困，2003年更宣佈破產。轉眼車禍已過去40年，儘管年輕美貌不再，但柳姐早前接受《蘋果》專訪仍笑談人生，她坦言：「上天安排咗，就惟有接受。」
撰文：余燕儀
攝影：陳慧安
溫柳媚遇車禍雖然已有40年，但至今仍有陰影，她說：「我唔鍾意人哋開快車，所以唔鍾意坐私家車同的士，我比較鍾意坐港鐵同巴士，安全感大啲。」對於車禍發生那刻，柳姐已經很少再想起：「初初開第一次腦係昏迷唔識驚，到之後埋唔到口要再開第二次，嗰陣都唔驚，係我家姐喊，我仲同醫生講笑，我話開完又開，整到我黐咗線，你要養我過世；第三次裂開流血水發炎，惟有又再開，開到第四次，姑娘問我做咁大手術驚唔驚？好危險！咁我俾佢嚇一嚇，開始有少少驚。」
今年特別驚
因為做了多次腦部手術，柳姐曾被後遺症苦苦折磨：「𠵱家後遺症少咗，因為我要命唔要靚，以前擺咗輔助嘅人造骨落去，喺額頭、鼻樑有個裂口，呼吸時空氣直接上頭，如果空氣有菌，就會喺假骨度積埋發炎，要插針抽血水同菌出嚟，如果唔得就再要開腦，鋸咗有菌嘅真骨，後嚟我諗假骨始終有危險，所以決定唔再放骨落去，𠵱家個裂口仲有，以前就有偏頭痛，後期好咗。眼因為斷咗好多視力神經線，尤其左眼，戴眼鏡都幫唔到，初初出街成日跌，因為睇唔到高低同距離。」
當年是公認美人，有否覺得車禍改變一生，怨天尤人？柳姐笑說：「冇，朋友有次望住我陰陰笑，佢話諗番我以前咁靚，𠵱家撞到咁嘅樣，問我覺得點？我話曾經靚過喎，仲唔滿足，有啲人出世有缺陷咪仲不幸，有時你諗吓，好嘅你有嘞，唔好嘅你都輪番鋪啦，我覺得可接受。」有否覺得命苦？柳姐坦言：「今年特別驚，覺得凡9字嗰年都唔好彩，好多事發生，69年簽電視台，79年撞車，89年家姐撞車，99年我好錫嗰隻狗仔走咗，09年爸爸走咗，今年19年大件事嘞，細個去灣仔廟宇算命，佢話我有75歲命，我仲有幾年玩喎，冇理由嘅。」雖然曾經破產，但現生活知足常樂，她說：：「同我住嗰個細佬都幾好，每年請我遊一次埠，因為首期我幫佢少少。」
鍾意一個人
柳姐覺得人生酸甜苦辣樣樣都齊：「由好有錢變到好窮，回望困難都過咗去。以前收工好興去避風塘、尖沙嘴食消夜，返工係好開心一件事，𠵱家都開心嘅，日日起身我都多謝，我又多一日嘞，上天畀時間你係享受生命，唔係叫你怨天怨地，我就好開心諗吓今日去邊度，我鍾意食雲吞麵、魚蛋粉，通度搵食，所以好少約人，我鍾意一個人，獨行俠，唔悶。」
場地提供：Table 18（apm）