過去曾以「博士」自居嘅民建聯立法會議員葛珮帆，因為學歷背景屢受網民質疑，現時喺立法會官方網站嘅學歷一欄，乜資料都冇填，被網民戲稱為「葛博士」。
寸人讀書不成反被寸
出晒名鍾意撐警嘅葛博士，之前已經成日出撐警post，結果畀網民拎嚟恥笑，日前佢又有新猷，就係喺佢facebook分享喺藍絲群組廣泛流傳嘅「網民金句」，當中包括「讀書不成的呼籲人去罷課」、「無賴的呼籲人搞不合作運動」、「腦殘的屈人哋腦殘」等等，喺藍絲圈內繼續自high。
難得葛博士咁有「文化水平」，對啲文字咁有研究，網民梗係「賣大包」，紛紛留言送上別出心裁嘅「網民金句」，等佢再增長見聞，而且網民留言仲受歡迎過葛博士原post，其中網民葉一知所寫嘅「冇讀到博士嘅學人自稱博士」，啲like數話咁快就過萬，係葛博士原Post嘅一倍，唔知葛博士會唔會妒忌？其他網民金句亦好多共鳴，包括「執法的人帶頭犯法」、「冇Number又要叫警察」、「愛國的人卻不在國內」、「反對完救流浪（動物）議案再支持返保護動物遊行」等。乜嘢叫真正民意？可能跳出藍絲圈先至見到。
李八方