由意大利教練納比帶領嘅國足，將會喺下個月出戰世界盃亞洲區外圍賽第2圈（40強賽），國足星期三公佈咗35人嘅集訓名單。由於早前國足喺亞洲區外圍賽抽到「絕世好籤」，佢哋都心知今次係出線嘅好機會。自納比喺今年五月回歸後，就開始傳國足會出現歸化球員，首先有中國血統嘅李可同侯永永歸化，到今次首次出現完全冇血緣關係、靠滿居留年期入籍嘅球員加入，已經完成歸化手續嘅巴西裔前鋒艾傑臣，改咗個正式中文名「艾克森」，今次大軍名單榜上有名，成功加入「護旗手」行列。
改名艾克森惡補中文
效力中超廣州恒大、30歲嘅艾克森順利入選中國足協35人嘅集訓名單，成為歸化兵當然要似番個中國國腳，根據中國足協早前公佈嘅《入籍球員管理暫時規定》，入籍兵第一步要做嘅就係了解國情，當然學中文、學唱國歌呢啲就走唔甩，甚至要識國徽同認國旗，名副其實學做一位護旗手。艾克森早有準備，已經將國歌下載到電腦同手機入面，方便練習，做足準備盡快融入中國！
艾克森即將成為國足史上首位無中國血統嘅歸化兵，佢同早前已經幫國足披甲上陣嘅李可唔同，後者本身因為阿媽係中國人，有一半華人血統。雖然艾克森無中國血統，但都好努力證明自己係中國嘅一分子，認為要學識中文先算係中國人，但對於呢位無中國血統嘅巴西人嚟講，中文係一門好深奧嘅學問，佢都承認自己嘅中文水平麻麻，所以打算請補習老師惡補中文，佢話：「我平時都會學吓中文，但家陣加倍努力，希望之後可以用中文同大家交流。如果有一日，我喺球場上捍衞嘅係中國國旗，我會好開心。」啱啱入籍嘅艾克森都已經表示自己愛國，仲要做埋14億嘅護旗手之一，真係「厲害了我的國」！
武磊下個月先歸隊
不過，艾克森因為要跟恒大踢亞冠盃，所以唔會參加喺星期六開始嘅首階段集訓。至於家陣喺西甲愛斯賓奴效力嘅前鋒武磊，就會喺下月1號嘅第2階段集訓先到廣州同大軍會合。