【黑鏡線索】
一直覺得，人大咗思想係好難改變。改變，係要有好大嘅外在力量先有可能逼到出嚟。一個人改變唔常見，而當一大班人，因為同一外在力量，而一齊喺同一時間，向住同一方向改變，個人認為，呢個就係所謂嘅「時代革命」。
香港社會一向有啲乜嘢比較共通嘅諗法？大部份人口，嚟自幾次大逃港。逃港，係為避北方政權。北方建國，人民有兩個選擇，一係留，一係走，大多數留，少數走，而之後羅湖河以北所發生嘅亂象，畀大家清晰嘅結論：走係啱嘅決定。亦即係，無謂撐、搵錢至上、以和為貴、唔對路就走，係最深刻嘅教訓。
大家有以上諗法，大家都知，777政權都知，於是乎，大家反送中？冇問題，由得班友行，和理非咗都三十年，行禮如儀啫，學葉劉話齋，嘉年華會啫，行完就散，執埋垃圾，第二日就開工，咪完囉。話之佢一萬人定二百萬人，講返句尊重大家遊行嘅權利，大家本來就失敗主義，會自己同自己妥協啦。
同伴支持好重要
唔得嘅，靠嚇囉。大家咁熱愛守法，將明明係西方用嚟約束當權者嘅法治精神，硬係要嚟加諸落冇權冇勢嘅自己身上，即係誤會咗犯法等於破壞法治，咁咪嚇班友話犯法囉，咁已經割席啦。唔得，咪出黑社會囉，大家最驚亂嘛。再唔得，咪嚇話影響經濟囉，至多咪派埋錢囉，一定收聲，大家最終都係想多啲錢箒。最終極，話出解放軍，一定嚇到冇人出街啦。
777政權同支持者，招招望住大家嘅一貫諗法嚟打，點睇都冇失敗嘅可能。唯一漏洞，係如果大家一貫諗法改變咗，但主流諗法，根深柢固，邊有可能變？
係，一個人改變諗法好難，但係有人同行，機會就大啲。好多人批評fb係回音谷，回音谷就肯定，但回音谷都有發揮正面作用嘅時候，例如一齊改變嘅時候，回音，變成同路人嘅打氣，改變中途，一定會多少迷惘，多少疑惑，但當你每分每秒都可以拎部手機出嚟，俾人打氣，又打吓人氣，效果倍增，原理同戒酒會，長跑減肥group等等一樣。人係社交動物，peer support好重要。
碌手機互相打氣
當然，每個人嘅fb圈裏面，同行人比例可以好唔同，比例低嗰啲，會覺得，係，係有人互相扶持，但來來去去嗰幾個，好多人冇出聲喎，有可能氣餒。呢個時候，和理非百萬人鳩行，就忽然唔係咁鳩。因為你睇，大熱天時都出嚟，原來咁多同路人。然後，高高低低，起起伏伏，政權招數盡出，七十日之後唔知大家係咪收晒檔，仲要落大雨，點知嘩，又係百幾萬人行出嚟，於是就明白，呢個堅係時代革命，大家堅係一齊改變咗。
就係咁樣嘅節奏，日日碌fb，藉住每日最新發展，朋友圈內同路人網上peer support扶持，然後每幾星期，整次大型遊行，等大家見到朋友圈外嘅主流，存在就係打氣，存在就係被打氣，用咁樣嘅節奏loop，三個月後改變之大，恍如入咗龍珠精神時光屋，割席、經濟動物、和理非極端主義？我諗到今日，冇人再咁樣標籤香港主流民意。
facebook以上嘅貢獻，係unintended consequences，777多得佢唔少。但有迹象顯示，fb香港intended嗰忽，其實係同今次運動逆流而行，下次講。
撰文：宋漢生