利物浦領隊高普被德國《圖片報》選為上季最佳教練，冇出席頒獎禮嘅佢透過視像通話分享得獎宣言，竟話有可能同利物浦喺2022年完約後退休，但一向幽默愛兜圈嘅佢，或者只係講笑。
高普同利物浦嘅合約仲剩三年，一直有傳紅軍想同佢續約，但佢始終唔肯動筆，只係不斷向外界話自己有幾愛紅軍。不過，呢位啱啱獲《圖片報》頒發最佳教練獎嘅52歲教頭，突然喺分享得獎宣言嘅直播度話：「我家陣當然希望繼續咁（執教利物浦），但兩三年後唔知道會發生甚麼事，或者我會退休。」佢之後補充：「我唔係話咁係必然會發生嘅事，但假如真嘅話，你就唔會太驚訝。」
高普再被問到佢喺2022年後會有乜打算，佢話：「如果照我想安排嘅次序，首先我想教德國國家隊，然後係拜仁慕尼黑，再返去多蒙特，並將最後嘅一生交畀利物浦。我仲未有頭緒，都唔知道會點。」