沒有暴徒，只有暴政，黃台仰之瓜，何堪再摘，「廣東人就係喜歡搞事。」語言學家黃良喜教授說：「我們由辛亥革命開始好多都係廣東，譬如孫中山係香山人，康有為、梁啟超都係廣東人，仲唔係廣東人鍾意搞事？亦都係廣東人比較正義、勇敢、前衞，思想比較開放。」
訪問由廣東人談到廣東話，2014年起粵語成為我們的抗爭語言，「與其話佢變成抗爭語言，不如話喺香港係一個分水嶺，令大家更加覺得粵語係我哋抗爭嘅語言。之前粵語有用嚟做抗爭，但似乎未試過覺得粵語受威脅，普教中之後越嚟越覺得粵語受威脅，14年係一個總括嘅爆發，粵語更代表我要企硬嘅文化，我要保留嘅生活，我要保留嘅價值觀，一個有代表性嘅事情。」
警察開槍爆眼等一切肢體暴力源於運動初期「自由X」等語言暴力，本報請黃教授講解。下列都是學術分析，絕非鼓勵爆粗，也跟政治立場無關。
撰文：陳勝藍 攝影：董立華
浸會大學英國語言文學系教授黃良喜指出，今次運動的粗口大部份不是抗爭者提出，例如「自由X」便來自警察，他說：「其實邊個講粗口都唔出奇，因為香港個個都講粗口，所以講粗口本身冇乜大不了，但當你攞女陰同自由（掛鈎），鬧追求自由嘅人，所反映嘅價值觀就事大。」事後有人質疑說的應是「豬X」，黃教授等人恁地認真，完整分析錄音頻譜、時長、基頻變化，證明的確是「自由X」。他寧願對方說「豬X」，畢竟只是無意識衝口而出的一句粗話；「自由X」卻是有意識地針對自由等的香港核心價值及女性尊嚴。
語言學家對字句很感敏，他解釋：「當一個維護治安、和平嘅人執勤時用侮辱女性嘅說話嚟侮辱對自由嘅訴求，我覺得呢個大件事好多，究竟我哋嘅執法者係咪有正確嘅判斷能力、執法能力？一個人可以喺街上持槍係有好大責任，但佢哋受嘅命令係咪淨係聽從命令，定係有思考能力？呢個係好值得思考嘅事情。」從自由X看出警察有意使用暴力？「我覺得呢啲係佐證，當佢可以用『自由X』罵人，加埋我哋𠵱家睇到嘅行為，你好難話好多人對警隊嘅行為有憂慮係冇根據。」
性器粗口 非廣東人獨有
黃良喜在新澤西州立大學取得語言學博士，聽過美國人將粗話混合名詞，像Ken-f__king-tucky、Carli-bloody-fornia，但不常用；香港粗口卻遍地開花，但凡動詞、名詞之間定有性器官，他說：「香港嘅粗口百姓用得最多，我去過嘅城市、地方，我唔覺得人哋經常講粗口，但喺香港經常經常講粗口。」據他所見世上所有語言的粗口都圍繞同一主題，就是性器官，有時甚至不知道是性器官，例如我們叫女孩子做丫頭，丫字就是模仿女陰的符號，「叫丫頭就係因為……就係嗰個樣。」而客家方言甚至現在台灣人都稱大女、二女為大屄（普通話音B）、細屄，屄就是女陰。
不少地方都用女陰罵人，但內地人不知出於尊重女性還是無知，用來讚人，開口埋口牛逼（都是音B），牛逼前牛逼後，其實牛逼就是牛屄，滿口牛歡喜，「牛屄其實講母牛性器官，因為母牛性器官好大個，所以牛屄變成好勁、好大嘅意思，好多使用普通話嘅人講啲嘢好牛屄嘅時候，佢根本唔知道己講緊乜嘢！」另外對於香港政府、警察的行徑，很多人用DLLM洩憤，縮寫粗口不是我們獨有，例如新加坡人用女陰罵人通常說臭X，而閩南話女陰是chee by或者chee bye，無論他們說chao chee by或chao chee bye，簡寫都是CCB，押上伯母就是ka ni na bei chao chee bye，簡寫KNNBCCB。記者溫提：董建華英文名就是Tung Chee-hwa，完。
男女平等，既然女陰滿天飛，男陽也走不掉。大家或者知道中國古代稱男人性器官為「鳥」，而讀音跟今天的動詞粗口沒有兩樣，但未必知道這既是名詞也是動詞，現在我們寫中文表達性行為動作不是門加小就是尸加吊，其實古文就是鳥。它甚至是形容詞，《水滸傳》裏面便有不少鳥人、鳥事，黃良喜憶述：「我記得小學睇《水滸傳》，啲人咁鍾意鳥嘅？」題外話一則，古文沒有名詞、動詞、形容詞之分，譬如「一個方便」是名詞，「方便他人」是動詞，「非常方便」就是形容詞，直至清朝《馬氏文通》說西方有一門學問叫葛朗瑪，即是grammar，中文才開始有了詞性，「亦都因為鳥字讀X，我哋就知道佢由一個動物，因為形態關係隱喻一個器官，之後代表個器官所做嘅動作。當然好多人講嘅時候未必知道咁精采嘅故事，到你知道嘅時候，咁仲算唔算粗口？」
繼續探討陽具，祖字就是示加且，示代表神，例如神祇、社會，黃教授透露：「且係乜嘢？其實且就係『啫』（陽具），你個祖宗冇神啫生得出你咩？」他補充：「我講呢啲例子其中一個原因係我想同大家講，所謂粗口、不雅嘅嘢有一些好原始嘅動力。」大眾愛聽學者講粗口是因為接地氣，令他們跟斬叉燒師傅一樣，「不過我想講，唔好因為呢啲原因好想我哋講有關粗口嘅知識，因為對件事冇用，唔會令呢個社會更公平，可能會令呢個社會多一種語言暴力。如果我哋講粗口係講出一種幽默、深度，咁佢未必係語言暴力；如果我淨係發洩、亂噏就冇意義。」事到如今，我們更需要幽默感。
5大訴求 5大建議
黃良喜是土生土長新加坡人，2000年結識了香港女朋友才開始學粵語，「算唔算外國勢力？或者啦。唔係所有人攞外國護照都顛覆政府，或者搞亂香港，好多時只係大家見到公平嘅嘢就支持，唔公平就反對。」他繼續講課：「粵語係唔係特別適合抗爭嘅語言？唔係，人類所有語言都適合抗爭，因為我哋嘅語言代表我哋嘅生活、文化、歷史，我哋每講一個字，發一個音都包含着好長嘅歷史、生活，因此用自己語言去反抗一些影響你生活、價值觀嘅嘢，都係一種反抗。」
現在誰都講五大甚麼，抗爭者五大訴求政府一項不理；香港罷工難達共識，因為很多人的五大訴求是吃、喝、拉、撒、睡，故此阻人返工燒槍袋；藍絲也在報紙頭版登廣告列出撐警等五件事；黃教授從廣東話角度提出五項抗爭建議，純屬學術討論。傘運時期Beyond的歌幾乎成為香港市歌，因此他第一建議寫歌，即使三、四個字一句的歌謠也行，像「月光光，照地堂，衰林鄭，禍香港。」不管誰創作在先，可沒完沒了接下去。
第二繼續創造新句子、詞彙、新字，傘運時期有人創了「手+傘」字，是撐的讀音及意思，今次則有「黑+警」字，讀音也介乎警黑兩字之間，「正正說明香港粵語好特別，我哋有好大包容性，可以接受唔存在嘅音。呢個唔係語言特別，係啲人特別。」例如雪茄的茄本應讀作茄子的茄，讀「雪卡」是來自上海話，「我哋經常借其他聲音豐富我哋嘅語言，呢個係粵語特別地方。」第三多講多寫粵語，別要怕，喱、呢、啦、囉、㗎、喇、噃即管寫出來，「唔好話粵語寫唔出，係寫得出，冇字冇音就用其他方法寫落去，你未必一定要寫打劫，你可以寫老笠。」
第四是將粵語融入我們所識的其他語言，例如exac7ly、so99y、C9、on9，「其實我最初見到on同9，我都唔知佢指嘅係online定係鬧人戇居，我覺得呢啲可以令語言更豐富。你可以創造更新嘅嘢，可唔可以寫『揹-nagement』？揹鑊個揹，management係要揹鑊㗎嘛！」第五別管甚麼正音正字，請用現在流行的廣東話，「我知道香港有一股勢力、一些人講正音正字，非要講時間（時姦）不可，唔可以講時間（時澗）；一定要係糾察（狗察）隊，唔可以係糾察（豆察）隊。我覺得唔使太執着，你唔係同古人溝通。如果係要問米、招魂咁我冇辦法，你係同現代生勾勾嘅人溝通，人哋要時間，你唔使姦佢嘅啫！」
他指正音正字令廣東話變得狹窄，失去昔日那種胸襟，「英語之所以變成世界通行語言，同我頭先講呢五點有一定關係。你睇到英語發展史佢就係不斷容納好多語言，不斷接受唔同口音，不斷使用、創作、出新詞彙，新嘅表達能力出嚟，佢就會好精采，好強大。」語言本應活潑生動，譬如坊間「香港法治，毀於政治」、「釋放義士，還我法治」、「適時發聲，留力長征」口號任君創作，而「林鄭呃緊你，惡法仲未死」更顯出粵語特色，因用普通話不押韻。
都說訪問跟政治立場無關，最後他提醒大家小心使用光復一詞，從賣淫大媽手中取回屯門公園、從水貨客取回上水生活空間可用光復；光復香港、光復元朗則說不通。不是說中文本無詞性嗎，他在FB提出清新元朗，有人使用。時代革命則講得通，任何思想推進都是革命，未必有推翻政權含意。
