除咗沙利患肺炎之外，祖雲達斯喺開鑼前再傳出另一單唔好嘅新聞，事關有傳媒爆料，指陣中嘅葡萄牙球星基斯坦奴朗拿度（C朗）嘅律師團隊，承認喺涉姦案中畀掩口費女方。早前C朗被指控喺2009年涉嫌強姦一位名為Kathryn Mayorga嘅女子，雖然C朗本人已經作出否認，不過據美國傳媒近日報道，C朗嘅律師承認喺九年前，已經畀咗37.5萬美元（約292萬港元）女方做掩口費。C朗嘅律師就回應指，呢一筆錢並唔代表承認C朗犯咗強姦罪，只係希望女方唔好將件事張揚出去，C朗嘅律師團隊亦都強調雙方係喺自願嘅情況下發生關係。至於C朗本人都喺上年10月就呢單案作出過回應，否認自己有強姦過Kathryn Mayorga：「我堅決否認對我嘅所有指控，強姦係一個可怕嘅罪行，佢違背咗我嘅信仰。」