國際足協（FIFA）周一公佈咗2019年普斯卡斯獎嘅10大候選金球，當中美斯同伊巴謙莫域兩大球星都有份角逐，仲有水晶宮翼鋒安祖斯唐辛同森多利亞前鋒加利亞雷拉嘅金球。球迷可以喺9月1日前上FIFA官網投票，然後會根據票數定出最後三強，再由FIFA邀請嘅名宿進行最後投票，喺9月23日嘅FIFA頒獎典禮度就會公佈得主。今年最後10強包括美斯今年三月對貝迪斯嘅笠射、伊巴喺上年美職聯對FC多倫多時背向龍門嘅蠍子擺尾（圖）、唐辛喺英超對曼城嗰球30碼窩利衝力射球，以及加利亞雷拉喺意甲對拿玻里嘅後腳入球。值得一提，10位候選人得伊巴喺13年拎過呢個獎，而上屆得主係利物浦嘅穆罕默德沙拿。