3年前德國發生駭人聽聞嘅火車斬人案，導致4名港人受傷。當年62歲邱樹平為咗保護家人，用空手抵擋手持斧頭等武器嘅兇徒，一度重傷昏迷，而事隔3年後邱樹平已經康復，前日仲獲德國政府頒授巴伐利亞州英勇勳章，表揚佢嘅無私表現。
傷口疤痕漸漸平復
德國駐港總領事館前日喺facebook專頁透露，為咗表揚邱樹平英勇無私，德國巴伐利亞州州長向佢頒授一枚巴伐利亞州英勇勳章（Bayerische Rettungsmedaille），作為其他市民榜樣。總領事館衷心恭喜佢，讚揚佢當日冒着極大生命危險，奮不顧身抵抗兇徒，雖然自己身受重傷，但就保護了大部份乘客，又祝願當年同樣受重創嘅歐陽先生早日完全康復。
邱樹平同記者講，要多謝德國醫護人員照料，又感謝港人關心，佢話16年7月受傷後一直養傷到17年底，由於佢腹部、頭部受重創，最長傷口達26厘米，返香港休養期間，長達10個月要着住又熱又焗嘅壓力衣控制疤痕增生，又需服用中藥調理身體，現時佢身體情況尚可，頭部腫脹同變形已慢慢平復，腹部部份疤痕亦慢慢變淡，但仍有較深疤痕未退。