前香港足球代表隊主帥加利韋特，上年9月起教咗港足3個月就辭職，走咗去日本執教日乙球會東京綠茵，當時佢仲豪情壯志話要帶隊升上日職，點知佢教咗東京綠茵22場只係贏得7場，喺上個月就慘被炒魷。不過「白咖喱」好快又搵到新工，禮拜二位於江蘇嘅中甲球會南通支雲就宣佈，正式同呢位45歲嘅英格蘭籍教頭簽約，後者會帶隊踢埋今季中甲賽事。事實上，加利韋特喺2016年曾經教過另一支中甲球會上海申鑫，幫球隊成功護級之後，就轉咗去教中華台北同香港隊，帶領香港力壓北韓殺入東亞錦標賽決賽周之後，最鍾意食日本拉麵嘅加利韋特，放棄咗香港呢個美食天堂去咗日本，唔知𠵱家去到江蘇又有冇啖好食呢？