祖雲達斯新教練沙利出名係老煙槍，曾經同傳媒自稱話一日要食60支煙咁誇張，但個肺就出事喇，周一祖記證實，沙利因為患肺炎家陣睇緊醫生，唔知可唔可以趕及喺今個星期六意甲開鑼復出，領軍作客鬥帕爾馬。
祖記今季簽咗新星中堅馬菲斯迪歷特，再免費簽入咗艾朗藍斯、拉比奧特同保方，配合原本嘅基斯坦奴朗拿度、邦路斯、保羅戴巴拿等球星，組成明星足球隊咁滯，今夏由車路士過檔嘅沙利，執住一手靚牌應該好爽先係，但佢上個禮拜已經缺席對丙組仔泰利斯天拿嘅熱身賽，當時消息話沙利患流感，但祖雲達斯周一就喺官網話，呢位愛吸煙嘅60歲主帥患肺炎，家陣接受緊治療。
日吸60支煙攞嚟衰
意甲今個禮拜六就開鑼，揭幕戰就係祖雲達斯作客帕爾馬，沙利就唔知趕唔趕得切督師喇。其實，沙利係球壇出名嘅「煙鏟」，以前佢教低組別球隊時，有唔少相係見佢喺場邊食煙，佢仲同傳媒自爆過，一日要食60支煙，而佢上季教車路士嗰陣，因為英超比賽場地全面禁煙，佢仲成日將香煙濾嘴擺入口咬住頂癮，而且佢帶車路士贏歐霸盃之後，就拎埋雪茄出嚟咬住慶祝，之後就匿埋一邊食煙，家陣個肺有事唔知有冇關係喇，總之吸煙危害健康啦！
巴神低薪回歸意甲
另一邊廂，「升班馬」布雷西亞周日宣佈簽入自由身嘅「壞孩子」巴洛迪利，呢位29歲意大利前鋒禮拜一舉衫，號碼一如以往係45號，而且原來巴神細個就同養父母喺布雷西亞住，一向好孝順嘅巴神就話媽媽開心到喊：「當我話畀媽媽知，我會加盟布雷西亞，佢即刻開心到喊，因為呢個係我哋嘅家鄉。」
曾經36次代表意大利國家隊，入過14球嘅巴神，自從離開曼城之後變咗球壇浪人，流落過AC米蘭同利物浦，2016年去到法甲尼斯踢咗兩季半，今年一月轉投馬賽，半年合約到期後回復自由身，冇班落三個月之後加盟布雷西亞，不過布雷西亞只係話巴神簽咗「好多年」約，未有講明幾耐，據報年薪只係150萬歐元（約1,300萬港元），周薪大概三萬歐元，比起巴神以前嘅人工低好多。