根據《每日郵報》報道，只要阿仙奴射手拿卡錫迪同奧巴美揚今季幫到球隊殺入前四，佢哋就可以續約兼大幅加人工，真係聽到都興奮呀！今個夏天轉會窗，阿仙奴一反常態簽入六位新兵，搞掂增兵事宜之後，球會亦都開始着手處理陣中球員嘅續約工作。據指奧巴美揚同拿卡錫迪同球會嘅合約分別尚有2年同3年就期滿，不過如果佢哋今季幫到兵工廠殺入前四拎到歐聯參賽資格，佢哋嘅人工就會加到去同陣中最高薪球員奧斯爾差唔多，大概30萬鎊周薪（約284萬港元）嘅水平。其實自從上季開始，奧巴美揚同拿卡錫迪就成為阿仙奴陣中不可或缺嘅主力，就連領隊艾馬利都話呢兩位咁合拍嘅鋒線拍檔非常重要，難怪咁高人工都想留人喇。