國泰因有機師參與反送中運動成為北京的打壓對象，連行政總裁都要辭職，喺國泰做咗民航機師近20年嘅公民黨譚文豪，唔想因為自己嘅身份，令國泰俾班建制藍絲拎嚟做藉口攻擊國泰，噚日毅然決定辭職。
譚文豪噚日最先透過社交網站公開辭職決定，佢喺fb貼咗張當年後生學揸飛機嘅相，話自己01年首次喺香港正式飛，通過多次考試後，佢嘅機師執照留低A330、A350、B747呢啲飛機型號，佢又多謝國泰呢間「一手一腳栽培我成為『今日的譚文豪』的公司」。
比起失去眼睛 辭工微不足道
佢又話自從2016年立法會選舉開始，「屢屢有人以我的職業大做文章。包括謝偉俊在選舉論壇誣衊我在『特首行李門』中只譴責梁振英而放過航空公司」，仲有689喺「添美道熄燈」事件入面質問「譚文豪是哪家航空公司的機師？」指呢班人「只問政見不問是非」。
後來譚文豪見記者話，眼見近期國泰受到不必要指控同迫害和壓力，連行政總裁都要走，佢唔希望業界再承受白色恐怖，出於愛國泰所以毅然決定辭職，又話反送中抗爭者入面，有人失去眼睛、有人失去生命，佢嘅辭職只係微不足道，強調如今最重要是與港人咬緊牙關、並肩同行、爭取公義。而國泰發言人回覆《蘋果》查詢時就證實收到譚文豪請辭，又話譚已經唔係國泰員工。
李八方