今夏轉會窗係咁傳會離開巴塞隆拿嘅巴西中場菲臘比古天奴，終喺禮拜一正式以借將身份加盟德甲班霸拜仁慕尼黑，借用期一年，加盟後古仔會着洛賓退休後留低嘅10號波衫。見到古仔喺拜仁公佈嘅相入面笑到見牙唔見眼，睇嚟走得甩真係令佢感覺興奮。
不過，另一位前紅軍球員就唔知笑唔笑得出，喺上年接力喊走嘅安利簡恩，效力咗祖雲達斯一季就面臨被踢走。
27歲嘅古天奴上年以天價1.42億鎊轉會費，由利物浦轉投巴塞隆拿。效力球隊季半，各項賽事上陣76場射入21球，都算係不過不失。不過，呢段時間古仔始終融入唔到球隊，更不時喺魯營比賽嗰陣被主場球迷噓爆，認為佢嘅表現配唔起咁嘅身價。
一年借用費7,500萬
夏季轉會窗開重開後，古天奴離隊嘅消息就傳過唔停，一時話佢會以借將身份回歸紅軍，一時又話佢會加盟曼聯。傳得最勁嘅，應該係作為巴塞收購尼馬嘅交易籌碼，被送去巴黎聖日耳門。早排，古天奴嘅經理人就同巴塞高層一齊現身巴黎，似乎轉戰法甲大局已定。不過，上個禮拜五巴塞當地傳媒就爆出佢將會被借去拜仁，所以對畢爾包嘅西甲開鑼戰佢都冇入到巴塞大軍名單。同時拜仁高層路明尼加都證實，球會已經原則上同意借入古天奴，亦為轉會開綠燈。
結果，古天奴禮拜日就飛抵慕尼黑接受體檢，最終禮拜一完成轉會。拜仁會借用古天奴一年，借用費850萬歐元（約7,500萬港元），全部人工由拜仁負責，借用完後拜仁可以用1.2億歐元正式買斷佢。拜仁體育總監沙歷咸美斯就話古仔係世界級球員，個人能力強之餘仲可以打到唔同位，啱晒拜仁。古仔當然都好識做，大讚新球會係歐洲其中一支班霸，希望可以同新隊友贏到更多獎盃。對於追逐利萊辛尼失敗嘅拜仁，喺閂窗前可以簽入能力出眾嘅古仔，都算一家便宜兩家着。
簡恩都要執包袱
至於古天奴嘅利記前隊友安利簡恩，最近就收到祖雲達斯新帥沙利通知，佢唔會喺球隊來季嘅計劃入面，可以走人。呢位25歲嘅德國國腳上季夏天先轉會祖記，但因為今季球隊簽咗艾朗藍斯同拉比奧特，簡恩新季上陣機會應該大減，家下惟有睇吓轉會窗關閉之前走唔走得甩。