公民黨立法會議員陳淑莊﹙Tanya﹚今年4月發現有腦瘤後，先後係5月初做手術，7月開始接受電療，雖然成個療程差不多同反送中運動重叠，但佢仍有帶病抗爭， 6.16逾200萬人上街反送中當日，佢就上街頭同市民一齊發聲，原來Tanya 6個星期嘅電療噚日完結，Tanya仲係facebook發帖，話噚日朝早喺羅文嘅《激光中》歌聲下離開一號電療室，特別感謝腦外科馮醫生、腫瘤科黃醫生、電療室各技術人員同聖德肋撒醫院醫護人員，「讓我在激光中順利和安心地度過整個療程」。
Tanya仲喺帖文話，治療期間一直惦記因佔中案被囚嘅戴耀廷、陳健民、邵家臻同黃浩銘，「一直內疚未能做得更多」；雖然前日百萬人冒住風雨上街，政府繼續冷處理，但Tanya話香港人要互相打氣，「不氣餒，不放棄，8.31再上街，毋忘『反送中』和雨傘兩場運動的初衷，流過的淚和血」，重申：「五大訴求，缺一不可」。
9月接任泛民召集人
完成治療嘅Tanya仲有重任，原來現任民主派召集人毛孟靜或於9.28、即係5年前警方施放87枚催淚彈驅散佔領人群當日落任，而Tanya就會接任民主派新一個會期的召集人，喺今屆立法會會期最後一年同民主派議員反惡法。
李八方