資深女演員夏萍（原名盧少萍）於本月5日安詳離世，享年81歲，其家人昨日在紅磡萬國殯儀館孝思堂為夏萍設靈，喪禮以佛教儀式進行，今早9時出殯。靈堂佈置簡潔，中央擺放夏萍的彩色遺照，並掛上橫匾「往生淨土」，堂前有三個心形花牌，由夏萍子女及契仔林家棟致送。黎明、劉德華、黃秋生、胡楓、盧海鵬、錢嘉樂夫婦、汪明荃及羅家英等分別送上花圈致祭。謝賢、羅蘭、丁羽、周驄、黎耀祥、唐佳與雪妮等昨日都有到靈堂鞠躬。
趕及最後一面
家棟昨日4時許抵達殯儀館，他受訪時數度落淚，並透露夏萍生前已交帶不想火葬：「契媽生前講過想土葬，佢話好驚火，所以安排土葬。」家棟指夏萍自稱81歲：「因為當年嚟香港搵工，所以報大咗少少，照計都係寫81啦！」家棟透露夏萍因中風離世：「其實佢7月底中風，因為本身有糖尿病，又有高血壓，所以醫生就講咗，話預咗某啲藥會影響個病情，醫生亦都話佢咁嘅年紀，亦好難去做一啲好大嘅動作去幫佢手，惟有用藥物慢慢去吊住，希望佢可以冇咁辛苦。」家棟表示得悉時身在內地開工：「聽到呢個消息就同佢講可唔可以捱到我返嚟，佢話佢盡人事，最後捱咗兩個禮拜。」最終見到夏萍最後一面。
問到兩人之間的難忘回憶，家棟指過去在電視台相處的二十多年，覺得夏萍性格率直，經常用粗口罵他，最開心是大家開工時會不停互相「問候」，甚至自己被蚊叮到，夏萍都會出手幫他止癢，好像媽媽照顧小朋友一樣。至於夏萍的遺願，家棟說：「佢成日都擔心自己走咗會點，我話唔使擔心，我喺度，我可以做嘅就係陪住佢。」
親友陪伴在側
張國強昨日到靈堂致祭時表示：「佢入院我一直陪住佢度過嗰十日，佢好安詳咁走，都係我好大安慰。」他表示夏萍離世當日，他與對方的家人、契仔及數位圈中人陪伴在側：「佢見到家棟之後，好似釋懷咗，第二日就走喇，好有佢嗰種堅持。夏萍其實一路都唔舒服，有老人病都好正常，喺護老院跌親，都即刻送佢去醫院，因為創傷，情況唔係太好。」問到夏萍生前是否跌倒兩次？張國強說：「係呀，最初嗰次有輕微中風，第二次就嚴重啲，年紀大會引起併發症，嗰十日佢都堅持住自己生命。」
採訪：黃曉妍
攝影：仇志德