上星期四本欄講「中國留學生的愛國」，有位淺藍朋友話左丁山寫得誇張，佢來電話：「中國留學生民族意識強，自小受愛國教育，故此在外地會挺身捍衛國家，拒絕辱華言行，香港學生冇國民教育，對中國缺乏認識，係淺薄啲㗎嘞！」呢位淺藍朋友其實係番書仔，讀書時未讀過中史，呢幾年先至惡補，勤讀內地編寫嘅歷史書，對歷史嘅詮釋與左丁山呢類中學文科生唔係幾同。左丁山讀私校，國文與中文老師都係南逃難民，民國大學學歷不獲港英教育司承認，要在私校教書賺取微薄薪水，但佢地對中國語文與歷史之認識，自不然深厚過1960年代港大或師範學院之畢業生，佢地在私校任教，簡直係明益入唔到官校津校嘅「水皮學生」，例如左丁山之類。
當年老師講到鴉片戰爭，割讓香港，八國聯軍，簡直聲淚俱下，但有時間講額外課題，就痛罵朱毛，所以我地嘅歷史觀唔會係馬列唯物主義嗰套。大啲嘞，讀錢穆先生之「中國歷代政治得失」、「國史大綱」，錢夫子痛斥馬列史觀抹黑中國，尤其討厭「封建制度」呢個名詞。
馬列史觀在中國今天係正統，培養出來之所謂民族情緒只係為黨服務、聽黨話、跟黨走，在民間則製造恐懼，你防我，我防你，移民留學海外，亦避不了這股歪風。信報專欄作家章可怡在信報8月15日專欄，講一位加拿大華人，有如下一段：
「來自中國的同胞，交往多是這樣開始，見面自報家門，也把對方問個明白，之後，就找出人際關係的共同因子。初識已經知己知彼了。再下去，家人子女父母都互相交代，問：房子租的買的，車子一手二手，我認識有個修車師傅很實在……再下去，會告訴你他表弟的外父是某省的副省長，有需要，可以溝通溝通，或者你家鄉的同鄉會會長他認識。又會要求私下調更，找人代簽到，使人為難。」
即是話，海外中國大陸人同自己人交往，小心翼翼，要摸清對方家底出身之後，先至敢判斷對方會否係「街坊組長」，負責打小報告之人，既然如此，有甚麼愛國集會，邊個敢唔去就自惹麻煩咯，海外中國人民族情緒就係咁解。
網上有中國作家賈平凹一段講中國人生活：「大米不好就出國買；奶粉不好就海外帶；霧霾來了就戴口罩；汽油漲價就連夜排隊加；自來水不安全就買瓶裝水喝；癌症發就拼命養生；教育不好就送孩子出國留學。總之將聰明才智全部用在苟且養生。然後輕蔑的對為了他們的權利奔走呼號的人說：這是個和諧的國家，你們不要太激進。」賈平凹有冇咁大膽講呢番話，是否別人冒名創作，有待查證，但係呢幾句話就係今天中國大陸人民的現實寫照。