【本報訊】民陣昨在維園流水式集會，市民冒大雨在銅鑼灣、天后一帶be water，記者在人群中見到不少藝人，包括黃耀明、何韻詩、王宗堯、王喜及阮民安。
曾被嘲「樂壇小強」的阮民安（Tommy）則表示自己與香港人一樣「打不死」，最近有不少藝人紛紛做「護旗手」，阮說：「由得佢哋啦！大是大非唔企喺香港人嗰邊就唔需要留戀。」
黃耀明：藝人被迫表態好可憐
黃耀明受訪時表示，政府以為「派糖」可息眾怒，但他不認同：「香港人係唔可以被賄賂嘅，雖然都係一啲民生措施，但五大訴求一個都冇回應，我會繼續出嚟，今次唔係最後一次。」
談到近日傳聞解放軍會殺入香港，深圳更有武警駐守，他指「咁就證明林鄭管治冇效，如果佢管治冇效點解唔快啲辭職？呢啲傳言係用嚟恐嚇市民，係一啲好低莊、絕對唔高明嘅手段，假如係真嘅，中國係破壞咗一國兩制，係佢一手摧毀呢樣嘢」。
至於藝人紛紛表態支持警察及支持中國，黃耀明指「佢哋竟然喺一個咁封閉嘅環境下仲轉發呢啲訊息，我覺得好可憐。特別係身為美籍華裔飾演《花木蘭》嘅嗰位女士（劉亦菲），佢都要率先做呢件事，我覺得好諷刺」。
對於政府不批准遊行，何韻詩表示：「絕對係一個剝削嚟。」談到連日來多人受傷，何說：「香港政府同警察係必須受到制裁，佢哋用唔正常、唔守規矩嘅方法打壓我哋嘅聲音。」並指警方越來越過份，「佢哋好似放題式咁用催淚彈，同埋啲差人冇再展示佢哋嘅編號，好似互相包庇」。對於近日不斷有人製造白色恐怖，何提醒市民「唔好因為呢啲白色恐懼就蓋過自己嘅判斷，香港喺國際巿場上仍然有地位，對於中國大陸嚟講，香港仲有好重要嘅角色」。
王宗堯昨日全身濕透在銅鑼灣派雨衣給途人，他提到劉亦菲時指，「𠵱家好似返去文革，好多人對自己言行都有好多考慮同驚，我係本住良心去做，哪怕唔再接觸到嗰邊嘅市場，甚至乎被網民攻擊都冇所謂」。
■記者黃君怡、盧坤穎、馮嘉銘