國際名廚曼谷獻藝 - 左丁山

國際名廚曼谷獻藝 - 左丁山

到曼谷吃喝,欲以忘憂,誰知探訪相交四十多年家庭,朋友T和他的下一代,還是要問香港反送中條例所引發的一連串事件及討論泰國政治風波擴大的巴育首相宣誓就職事件,無法逃避政治問題。孫中山話政治乃眾人之事,眾人之事就是政治,麟伯等老人家喜歡講:「我不識政治」,大笑話也,佢哋與中國大陸打交道,賺人民幣,點可以唔講政治?大明星買唔買D&G、Versace、Coach、坐唔坐國泰,都要講政治呀!

住在Anantara酒店,七樓有一個Club Lounge,高層住客可以入內吃早餐、下午茶、黃昏快樂時間,唔使額外付款(其實房租貴啲,已計埋條數),因為有條件限制,入內人客不多,十分清靜。某日左丁山夫婦入內嘆下午茶,有兩位講普通話婦人帶兩小孩入內,大家食嘢,本相安無事,點知一位三四歲小孩嘅玩具可以發聲,係「V澎澎巴V」嗰種,吵耳異常,完全破壞寧靜氣氛,嗰位阿媽仲騎騎笑,用iPhone與兒子影相,直至有講歐洲語言嘅顧客唔抵得,叫侍應「外來勢力干預」為止,中國人幾冇面也。次日又食早餐,有印度裔夫婦小孩三人,小孩開着iPhone睇片,發出聲音,左丁山一望,印度男人已禁止小孩用iPhone,中國人成日話印度落後,難與中國經濟相比,因為中國人眼中只係銀紙。

中國遊客咁有錢,唔知會唔會有品味食高級菜式呢?Anantara酒店9月2日至9月8日舉辦一個World Gourmet Festival 2019,有16位名廚來自9個國家共有11粒米芝蓮星嘅國際名廚,到酒店四間食肆獻藝,令人矚目嘅係兩位台灣廚師Kai Ho何順凱(Tairroir)及Richie Lin林泉(台北MUME)在Spice Market(泰國菜餐廳)登場(9月6日),收費每人9500銖,貴絕全場,這個價錢並非一般泰國人所能負擔,必是富裕人家才會訂位捧場,至於其他的日本、德國、法國、意大利、英國的星級廚師在其他酒店餐廳「表演」,每位收費由5500銖至8500銖,是否能吸引大量捧場客,很難預料,或者亞洲區內的美食家會聞風而至。由香港到曼谷吃Kai Ho一頓七道菜式晚餐連預設酒水,花費2888元(含稅)加機票及酒店房租好像奢侈一點,但既然香港有人乘私人飛機往東京吃超級壽司刺身,到曼谷吃三四餐也不算甚麼吧?這個國際名廚大會師並非為了賺錢,收益會撥作一個HIV慈善基金的經費,顧客是吃餐做善事。