特首林鄭月娥死攬警隊，縱容佢哋向示威者施暴，既然市民點叫喊警隊都唔收手，惟有喺國際層面發聲。因應8.11警方喺太古同葵芳兩個港鐵站等連串暴力鎮壓示威者已經到達恐怖襲擊程度，一呼百應嘅連登仔早前再發起眾籌，最終籌到逾180萬美元（約1,400萬港元），共2.2萬人參與。團隊噚日宣佈落實喺全球13個國家合共18份報章刊登廣告，今日至30日期間陸續面世，等香港警暴問題「揚名國際」。
G20即日隱身 各自爬山
6月喺G20峯會前發起過全球登報嘅「G20團隊」噚日下晝喺「Freedom Hong Kong」facebook 專頁話，經過同連登「我要攬炒」團隊準備後，落實喺13個國家合共18份報章登廣告。根據fb上載嘅圖片顯示，13個登報地包括日本、韓國、台灣，遠至英國、法國、德國、西班牙、瑞典、芬蘭、丹麥、美國、加拿大、澳洲都有。
早前眾籌籌到超過180萬美元，G20團隊預告，後續活動統籌及扣除登報實際費用後所有後續經費運用會由攬炒巴團隊全權負責，G20團隊即日起會退場，繼續隱身各自崗位，同各位手足兄弟爬山，但表明他朝有需要再喺世界各國登報時，「我們將立即重新歸位，為香港人的抗爭無限量出力！」
李八方