劉娟娟生前曾做過模特兒、形象總監等工作,在香港時尚圈及選美圈甚有影響力,不少圈中人對於她的離世甚為惋惜,其中形象設計師張學潤更以徒弟自居,感激恩師給予機會。
採訪:魯吉
徒弟張學潤
「我第一份工作係89年亞姐形象設計,當年佢係形象總監,好多謝佢畀機會我,令我開始喺娛樂圈嘅形象設計師工作,我一直叫佢師傅,好多品味同名牌都係跟佢學。佢係一代名模,好型,佢係一個好神經質嘅女人,好儍氣,完全唔似外表咁cool。」
亞姐吳綺莉
「係娟娟帶我入行,係佢叫我選亞姐,我細細個就識佢,當年我十件衫有九件都係佢幫我搵同借畀我。我喺上海生活十幾年,我成日同佢見面,佢帶我去買布做衫,佢真係好有型格好有taste。」
亞姐羅霖
「真係好可惜,佢喺各方面,image、時裝方面都係好難得嘅一個人才。當年參選時同佢一齊去西班牙拍攝,嗰時佢做形象總監,好錫我哋參賽者,遇到乜突發事情都會幫我哋。」
後輩馬詩慧
「今年2月有見過佢,當時喺醫院探完Kim Robinson,同佢傾偈完全唔覺得佢病,今日有朋友話我知佢走咗,好愕然。每一代模特兒有自己風格,佢好有氣派,係unique。」