政府越打壓，市民越頑強。噚日參加民陣8.18集會嘅市民逼爆天后，而支持唔只得一種途徑。中央圖書館隔籬一間裝修簡陋嘅士多，噚日就喺門口掛咗一張寫住「打不死有限公司」嘅A4紙，音響唔係播放銷售聲帶，竟然係播音樂劇《孤星淚》嘅插曲《Do You Hear the People Sing》，用意相當明顯。店舖仲特別以良心價賣飲品，770毫升嘅Bonaqua只售兩蚊，罐裝可樂只賣四蚊，平過便利店一半，有參加集會市民途經都大叫「好平」。
八方問返女店員，佢話間舖開咗八個月㗎喇，張A4紙唔係示威者大整蠱，舖頭真係叫打不死有限公司，老闆特別吩咐噚日要播《Do You Hear the People Sing》。至於點解以良心價賣嘢？女店員笑言：「我都唔知喎！」