香港𠵱家處於風雨飄搖嘅局面，有藝人企出嚟勇於表達自己意見，亦有人為咗唔得罪人而選擇噤聲，同樣亦有人隨住環境而改變自己立場。好似「女婿」04年喺鐵竇開餐廳，明星效應之下，再加上食物都有番咁上下質素，生意唔錯，點知佢因為一啲仇警言論，而得罪晒啲村民，搞到啲村民個個都唔妥佢，成班群起玩杯葛，結果搞到個場夥計仲多過食客。女婿即刻扮失憶，堅稱自己冇講過，又話成件事同佢冇關，之不過喺鐵證如山之下，啲村民又點會咁易罷休，最後都解決唔到件事，間餐廳要蝕本執笠離場，女婿仲修補唔到同村民嘅關係。
自此之後，女婿即刻轉軚，有時仲會喺網上鬧啲唔同政見嘅人，但係俾人反插多過認同，直到最近嘅「反送中」運動、表面上佢好似冇乜點表過態，實際係佢吸取過上次教訓、𠵱家主攻喺WhatsApp群組，叫人哋抵制呢樣，罷賣嗰樣，搞到啲朋友都覺得佢煩。查實做人嘅嘢，可以有表達自己言論嘅權利，中途轉軚，最終變得兩邊都唔討好，啲人都唔知你係人定係鬼。
撰文：Jessie
姐匙Talk
我姐匙縱橫歌影視幕後，多年嚟冷眼旁觀，娛樂圈大小事都走唔過我雙眼，歡迎大家嚟剝花生。