自言人生有點經歷的張小姐，人到中年上車，心儀何文田，希望住近父母；但二手盤短缺，三年多以來睇完又睇都未搵到心頭好，終領悟到真正肯賣樓的二手賣家有三種：離婚、分產、移民。終於到去年，張小姐用較估價高4.5%價錢買入一個三房單位。
「香港地樓價幾乎劃一」
談到初時看見心儀屋苑雅麗居難得有放盤，張小姐只抱平常心，「因為好多業主唔係真係賣，係試吓價，然後就話『我要加多幾十萬』。耍我？秤身家？相信擁有財富嘅人心態都係咁，佢真心想賣，但氣氛影響，人人賣咗買唔返，又話重稅不如留來收租。只有三種人會賣樓，離婚、分產、移民，撞到呢啲業主，就真係講到合理價。」
放盤當晚，經紀跟張小姐說有另一台客還價，且去到銀行估價，「經紀本來叫我等，因為佢話地產代理大老闆話之後樓價會平，但我心中有數啦，同埋父母都希望我快啲安定。」
她記得自己買樓一年多前，爸爸打算換樓，放盤五小時有兩台客睇樓，她憶述：「其中一台客是一家四口，個女人仲大住個肚，拖住個細，經紀代表佢求我爸爸賣層樓畀佢，經紀仲代佢話：『早四年落錯車，等了又等，積蓄食咗好多，如今想買層好舊嘅樓，如果你有第二度住，你好心賣畀佢啦！』香港真好悲哀！我唔知經紀講嘅故事係堅定流，但來睇樓嘅女人真係大住個肚。我爸爸唔係玩嘢，但驚賣咗買唔返，最後婉拒，即時封盤，個女人好唔開心。」
張小姐信命，自問負擔得來，即使經紀叫等多陣，「佢話再諗吓啦，睇吓會唔會冇人睇；但香港地，樓價幾乎劃一價，呎價普遍1.8萬至2萬元。喺我買入呢個單位，過去10年只得2宗成交。最後我用比估價高約4.5%買咗，唔緊要啦，努力搵返錢囉！」