容祖兒紅館演唱會進入倒數階段，除了每晚請來不同嘉賓外，祖兒也不停換上多套全新歌衫，前晚她就穿上價值30萬元的Celine金色珠片裙，跟嘉賓劉德華合唱。祖兒介紹華仔上台時說：「我稱唔上同呢位嘉賓係好好朋友，因為佢喺我心目中係遙不可及，早就超越咗偶像，係我學習榜樣。佢做事認真，待人接物以及對身邊所有人無微不至，總之佢叫我行東我唔會行南，佢叫我坐我唔會企。」隨即祖兒唱《謝謝你的愛》，華仔出場一同合唱。
靚仔是天生
唱畢後，祖兒問華仔：「點解你咁靚仔？」華仔笑說：「好多時我都同人講，唱歌跳舞可以勤力去練，但係靚仔真係冇得練，我天生嘅。」華仔笑言跟祖兒是不同年代的歌星，因此當初不明白她為何邀請自己做嘉賓，祖兒說：「你唔記得我哋有一年一齊攞獎。」華仔笑說記得，還指自己好似拖着女兒上台一樣。祖兒再自爆到紅館看的第一個演唱會，就是華仔在2001年舉行的「夏日Fiesta演唱會」，當時她和初戀男友捧場，祖兒接着還high爆清唱華仔的《開心馬騮》。
約定五年後
華仔再解釋為祖兒擔任嘉賓原因：「04年我哋一齊攞過最受歡迎男、女歌星，我本來希望14年又可以同你一齊攞，13年我已經開始準備，不過嗰年我好忙，因為我好色。」祖兒笑謂：「你講當年好忙繁殖下一代呀。」接着華仔再說：「咪搞咗個小龍女出嚟，所以我希望2024年我哋再一齊攞，你唔使等我，我趕緊上嚟。」華仔又表示囡囡知祖兒去看他的演唱會時由開場跳到完場，所以囡囡指祖兒有體力可以開更多場演唱會，最後兩人再合唱《一起走過的日子》。另外，前晚的山頂卡拉OK環節，祖兒坐專用「紅磡360」升上半空，獲一位90歲的婆婆要求合唱。
撰文：寶妮