曼聯中場保羅普巴今夏一直被傳會離開紅魔，加盟佢心儀嘅西甲豪門皇家馬德里。雖然英超夏季轉會窗已關閉，但西意法德球隊喺下月二號前仲可以簽新兵，紅魔球迷仲未可以放心。普巴大佬馬迪亞斯普巴上周四上西班牙電視節目嘅時候，就爆料話普巴仲未放棄走人念頭，希望皇馬唔好放棄簽佢細佬喎。
「喺曼聯冇嘢可以做」
目前效力西班牙第四級聯賽球隊皇家曼徹城嘅馬迪亞斯證實，佢細佬仍然想加盟皇馬：「普巴仲係想轉會，佢喺曼聯已經冇乜嘢可以做，所以依然喺度等緊。但佢冇因為咁而變得唔專業，繼續努力工作，相信應該嚟嘅始終會嚟。」
馬迪亞斯認為皇馬最終可以簽到佢細佬：「施丹好想要普巴，皇馬會長佩雷斯有可能同意簽佢。我唔可以保證普巴會一直留喺曼聯，但喺9月2號轉會窗閂前，乜嘢都有可能發生。」普巴喺今季首場英超帶領紅魔大勝車路士4:0，佢喺賽後接受訪問被問到去向，佢都講得幾隱晦，叫大家拭目以待。
施丹喺皇馬亦有佢嘅煩惱，今夏球會最大收購：以一億歐元由車路士羅致返嚟嘅夏薩特，因為左邊大腿肌肉受傷，無緣出戰上周六作客切爾達嘅西甲首戰。暫時仲有待確定夏薩特嘅傷勢，未知要休息幾耐，但皇馬中前場球員買少見少，施丹都無奈改口風，同佢搞到好唔妥嘅加里夫巴利本身都走硬，但施丹家陣都話喺今季會繼續考慮重用佢。
夏薩特受傷唔放巴利
施丹喺賽前記者會上講到巴利嘅情況：「原本睇嚟佢就快走人，結果佢依然喺度，所以我會喺計劃內預埋佢一份，巴利的確係一名重要球員。」施丹喺季前賽時曾經公開宣佈巴利即將離隊，仲話佢越快走對球隊越好，冇耐就傳佢會轉戰中超加盟江蘇蘇寧，點知談判竟然喺最後階段拉倒，有傳係巴利家人唔想去中國，亦有傳係佩雷斯叫停，唔想一毫子轉會費都收唔到。
記者會上，施丹都被問到收購普巴同尼馬嘅進展，但佢回應話兩人目前都唔係皇馬球員，暫時只會將精神放喺比賽，強調目前手上已經擁有一班最好嘅球員咁話。