【地產專題】全新樓盤沒有洗衣機，污糟衣物如何洗？驗樓師陳智康早前驗收盧華家族發展的九龍城劏房盤AVA 55一個劏房，發現單位沒有洗衣機，就連洗衣機入水喉也沒有預留，事後再問師傅詹濟南「詹Sir」，他亦坦言從來沒有驗過沒有洗衣機的新樓。
記者：陳家雄
從事IT行業的朱先生，三年前以332萬元買入166方呎開放式單位，「呢層係我第一層樓，主要因為銀碼低、校網好……沙中線通車後，呢區樓價會升，亦係我考慮原因之一。」本身與家人同住，當年拍板前考慮好耐，「因為嗰陣樓市唔係特別好，諗升定跌都諗咗好耐，始終第一次置業，雖然銀碼唔算好大，但對我嚟講都算唔少錢。」
人人說買樓自住唔怕跌，他覺得：「買樓純粹對沖租金，你問我買樓係咪有逼切性，冇，買樓係投資多過需要，需要嘅話可以租樓。就算將來自己搬出來住，未必要住返自己買嗰層樓。自己嘅物業唔一定要自己住，亦可以租其他地方來住，唔需要綁埋一齊。」始終單位銀碼低，一成首期連雜費僅約50萬元，「調返轉諗，市場唔係好多選擇，首期呢度係畀最少。劏房單位先至可以畀少首期上車，如果唔係，揀大啲單位，畀多啲首期，咁就要再儲耐啲錢。一係買，一係唔買。」
業主：生活空間唔使好大
三年來劏房盤劣評如潮，又被指樓價轉勢跌最多。他說有聽過，聽完覺得「忐忑囉，驚囉，但冇㗎，都已經買咗囉。」直至最近收樓，「感覺好咗少少，因為樓上有租盤成交，定返少少。始終樓價會升會跌，咁又唔會跌到渣都冇，如果跌好多，冇嘅，認命囉。你問我會唔會後悔，未必會。因為唔買呢度，都唔知自己買邊度。遲早都要買，遲早都要博，去到某個位點都要買一層樓。喺香港住，有個單位係需要。」
收樓前曾想像過實用166方呎有幾細，收樓後見到「放張床後就唔係好多位剩，但又未至於好壞嘅情況。」有人用車位比較劏房，朱生就覺得「我呢個單位真係住到，劏房都租到出去啦，（租唔出會否自住？）有朋友話第一次買樓，都要住吓先，諗緊。我覺得自己一個人住到，以前都住過宿舍啦，都是一張床，好多設施係公用，咁呢度廁所係自己嘅。因為現代人生活空間唔使好大，如果真係想活動，咪落街行吓。自己住，返到屋企都係瞓喺張床，用吓電腦，㩒吓手機，真正活動空間未必需要咁大。」他續稱：「你話係咪真係住唔到人？住到嘅，擺到床，有雪櫃，要有嘅嘢都有，洗衣機唔計。」
朱生好坦白，口中「洗衣機唔計」，因為買樓前，樓書已列明單位是沒有提供洗衣機。康仔驗收單位亦嘖嘖稱奇，「我驗咗咁耐樓都未見過新樓係冇洗衣機，甚至連洗衣機入水喉都冇預畀業主」，康仔問詹Sir後亦獲回覆「冇驗過冇洗衣機嘅新樓。」所以是次驗樓不把洗衣機列作驗樓工種之一。業主朱生回應：「咁咪拎落街洗囉，附近有洗衣舖。一個人住好都難儲到衫洗，拎落街洗都係一個選擇，現時都多人拎衫落街洗啦！」
全屋只得三塊玻璃，有兩塊需要更換，崩花超標之外，大梗玻璃有焊屎，康仔建議業主必須要求發展商更換，因為有機會被太陽曬爆。另外，小梗玻璃左側唧膠亦有氣泡。牆身油漆方面，有不少污漬及不平滑。開放式廚房鋅盆水龍頭鬆，但未有漏水，浴室洗手盆水龍頭則漏水入櫃，而且浴室地台去水位不平，坐廁及水箱都鬆，需要加固。結果驗樓評分獲68分，主要由於來去水、窗及油漆扣分。康仔表示，此樓盤驗收4個單位，是次單位屬於較好，部份單位再低10分，主要是玻璃窗較多，扣分亦較多。