左丁山兩公婆與曼谷朋友T五位家人在文苑吃晚飯，佢地話未曾食過咁好味嘅麵與甜品，讚不絕口，可惜一早預訂嘅片皮鴨，廚房話一定要在8時上碟，我地八時半先至到，已經凍晒，食鴨皮毫無味道，可惜也。七個人吃了10805銖（含稅）以匯率3.85計，即港幣2806，未夠在九福一半價錢。泰銖今年頭8個月升咗8%有多，成為亞洲最強貨幣，朋友T話強泰銖令酒店（一般以美元訂房價向外國旅行社賣房）及出口商（全以美元價出貨）叫苦連天，以前一百美元貨款可兌3300銖，現在得番3000銖多啲，梗係苦口苦面啦。
朋友T家姐T醫生係曼谷名醫，T醫生女兒在朱拉隆功大學教「特殊兒童教育」（即ADHD，閱讀困難、自閉症兒童之教學法），講及呢類兒童學習困難，家長都好擔心。左丁山大笑：「你位阿叔（朋友T）當年就係問題兒童，47年前14歲嗰陣，一放學回家丟低書包就騎單車出街，黃昏時候全身濕晒先至回家吃飯，直情似係有過度活躍症，回家做功課一定趕唔切，與兩位勤力到震，年年考前三名嘅家姐完全唔同。」左丁山唔想講嘅係，現在最搵錢嘅就係朋友T，在St. Regis酒店附近買咗樓，大家姐做大學講師，係人都知薪水一般，二家姐係名醫，但一直在公立醫院服務，唔肯出外掛牌搵真銀，薪水又是有數得計，兒童成長後各有發展方向，家長唔擔心得咁多。當年一家係小康之家，父母見T仔「唔生性」，一定考唔到朱拉或法政大學，索性送咗佢去一間二流美國州立大學，學到乜就唔知，但學到一口流利英語，返到曼谷就為外資公司聘用，平步青雲！朋友T個女在卡內基梅隆大學讀完碩士，英文講得好似美國妹，佢突然問：「Uncle，點解我喺美國大學讀書嗰陣，見到好多中國留學生講唔到英文嘅？聽講佢地考TOEFL都好高分嘅噃！」哎吔，點答呀，唔好教壞細路話中國學生考外國英文試出貓夠hi tech啦，一講到中國，T醫生嘅女婿及朋友T即刻追問香港人示威事件，一位泰國拳手在721元朗黑夜穿白衣涉嫌收錢打香港市民，佢地在網上早已睇到，而且黑衣白衣似當年曼谷之紅衣黃衣，泰國人容易對香港近事入心。一時之間不知從何講起，朋友T話：「示威衝突搞得耐市民唔安樂，慢慢就會唔支持示威嘅嘞，我地曼谷上次就係咁，而且示威激烈化之後，對方及軍警一定有派人滲透搞破壞，弄出爆炸傷人事件，嫁禍示威者，令市民增加反感。嗱，呢啲係我哋曼谷人經驗之談，香港人要注意吓！」左丁山為之苦笑。曼谷最近又有微型炸藥在空鐵站附近爆炸，事件可能係十年前黃衣紅衣大衝突之後遺症。