武球王勁到爆！周四歐霸盃第三圈外圍賽次回合，愛斯賓奴靠首次喺歐洲賽踢正選嘅武磊，開賽三分鐘射入個人生涯首個歐洲賽入波，主場再贈瑞士嘅盧塞恩三蛋，兩回合大勝6:0晉級，呢球亦係中國球員事隔六年再喺歐洲賽場上入波，而周五愛斯賓奴仲宣佈武磊新季會改着7號波衫。同日其他歐霸外圍賽，狼隊以4:0橫掃佩歷克，兩回合大勝8:0，會同意甲嘅拖連奴爭分組賽入場券。
