現年52歲的阮兆祥，當年參加新秀歌唱大賽入行，效力無綫多年，選擇離開熟悉環境，專注歌唱事業，可見其初心仍是喜歡唱歌的。阮兆祥滿有信心的說：「每樣嘢都要付出，我想好好捉緊今次機會，唔希望將來後悔。」對，追夢沒有年齡限制，誰說中佬沒有追夢的權利。
撰文：盧妹
攝影：林賓尼
阮兆祥的關聯詞，應該離不開「食字」、「搞笑」、「演技」、「扮嘢」及「盧覓雪」，跟「歌手」這個名詞似是風馬牛不相及，日前祥仔於尖沙嘴受訪時說：「我係歌唱比賽出身，希望好多年之後，大家搜尋我嗰陣會發現『呢首歌幾好聽喎』、『呢個節目幾好睇喎』，咁我就心滿意足。」再度離開合作多年的無綫，全因為了歌星夢？他說：「答中，因為又電視又唱歌，觀眾未必分到我，𠵱家就唔使分心，可以集中火力去做一件事，因為我真係好睇重唱歌。我從來唔會諗係犧牲，每樣嘢都要付出，我覺得過程先重要，真係想好好捉緊今次嘅機會，唔希望將來後悔。」
希望有共鳴
十月將舉行「King Of Dreams」演唱會，祥仔正在籌備流程：「我希望唔同年齡層都有共鳴，所以由70、80年代到𠵱家嘅歌都有。歌最正嘅地方係可以帶大家美好嘅回憶到眼前。」另外祥仔亦會出專輯，當中翻唱多位女歌手的作品：「用a cappella形式唱JW（王灝兒）嘅《矛盾一生》、李樂詩《終有一天感動你》。另外仲有曾路得同俞琤嘅《天各一方》，呢個2019年版，我搵咗修哥（胡楓）幫我錄旁白，修哥當時仲話『祥仔，你係咪搵錯人？叫我講嘢。』錄嗰陣，我覺得好感動。」
再以歌手身份錄碟開騷，祥仔坦言：「再入錄音室有種既陌生又熟悉嘅感覺，要完成唔係易事，要丟棄以前嘅一切，好彩最後都克服到。」做藝人的時候，老是希望多點自主性而選擇自資，現在回歸歌手身份，祥仔時刻提示自己只需唱好自己的歌。他不知樂迷是否有意欲消費，當歌手就是被動：「𠵱家抱住拆禮物嘅心態，好期待入面係乜，用正面嘅態度去迎接。」
場地提供：The AIR of The ONE