無綫藝人譚坤倫（Alan）在2011年因為參加《功夫新星》而入行，曾參演《果欄中的江湖大嫂》、《包青天再起風雲》等劇集，原來他更練得一身好武功，小學一年級就被爸爸送到河南的少林寺學校學習武術六年，遇上突發情況都可以自救。
撰文：何慧斯
攝影：仇志中
譚坤倫小時候被送去內地習武，學習北派套路，例如長拳、南拳及小洪拳等，99年就在河南省全市武術比賽中，先後獲棍術套路冠軍和劍術套路亞軍。談到小時候離鄉別井，Alan說：「細個較好動，但讀書乖，記得老竇只係問我想唔想，諗住好好玩就去。嗰陣每年只可以返屋企一次，試過思鄉半夜匿喺被竇喊。」不過後來他就樂不思蜀：「每日要5點幾起身，早餐後開始練功，一個禮拜至可以沖涼，我又唔識清潔，所以被竇有陣酸餿味。」
「學嘢快過人」
六年後，Alan回港讀書，依然keep住練武，到11年參加《功夫新星》入行，他說：「比賽後識咗好多武指，學爆破場面、中彈同被人打嘅反應，好有趣。我唔覺自己功夫好勁，未去到武師級數，但有功夫底，學嘢會快過人，但做動作演員仲爭啲，會努力。」Alan一身好武功，不過甚少出手：「最多係去現場支持，冇郁手，反而讀書嗰陣會有，啲學生好曳，阿Sir又會攞棍打人，屁股長期一個印。」
出道八年，Alan參演過逾70部劇集，曾在《果欄中的江湖大嫂》飾演李天翔的skinhead打手，最近就在《包青天再起風雲》演開封七子之一。雖然娛樂圈被指是跟紅頂白的地方，但他未有聽過太難聽的說話：「以前都以為會勾心鬥角，但現實冇，個個都係朋友。」