特首林鄭月娥老公林兆波自從喺6月硬推送中惡法以嚟，只係喺今年7.1同林鄭一齊為咗避開示威、坐海事處船隻到灣仔金紫荊廣場睇升旗禮時短暫喺公眾前蒲過頭，其後就只喺7月反送中示威中被連登仔點錯相，以為佢都有上街叫林鄭落地獄。林鄭呢排要自己執返「蘇州屎」，相信同老公都好少機會見面，唔通因此令佢心掛掛，要喺特首辦放張望夫山掛畫？
八方最近喺特首辦大堂等候採訪林鄭期間，發現大堂有啲唔同，原來掛咗幅巨型掛畫，點解突然咁有藝術氣息？八方查詢行政署，發現幅畫係以本地已故畫家陳福善畫作藍本製成嘅羊毛掛毯（圖），畫作名稱叫做《沙田望夫山》！唔通林兆波係林鄭嘅心靈雞湯，想喺特首辦大堂畀傳媒圍攻時可以「望夫」減壓？行政署就話掛呢幅畫「旨在展示本地藝術作品」喎！