8月人人放假，校友會主席在巴塞隆拿傳來一張魯營球場照片，恨得左丁山牙癢癢。傳短訊畀公子L，佢回覆話：「人在雪梨，香港啲麻煩嘢唔係幾想知。」連到肥仔K都兩日之內拍板買機票，一家四口飛去東京，到新水產市場豐洲吃壽司早餐。左丁山辛苦搵到幾日空檔，又走咗去老地方曼谷，住在新名字老酒店Anantara Siam（前麗晶、前四季）；無他者，老酒店房間夠大，地點夠方便（近四面佛及空鐵站），雖然食物及服務水平已比麗晶時期差一啲，但對老人家而言，還是好過住在設計燈光黑暗、浴室全透明、空間較細嘅新式酒店。
未上機啫，就接到短訊，家族第三代S少由中東飛往曼谷，叫左丁山介紹一啲朋友畀佢見。乜咁啱呀，整定呢位第三代S少有食神，同佢夾好時間，請佢食兩餐午飯，到Zanotti吃Parma Ham Pizza及到文苑吃鮑魚汁花膠撈麵。新一代其實好靈活走位，請佢食多餐都話冇時間，要與在中東認識嘅香港人一齊坐內陸機飛去Krabi（泰國南部海灣）享受陽光與海灘喎。
曼谷交通如常擠塞，左丁山唔好彩碰上災難式塞車，坐足三小時汽車至由吞武里區朋友T家中去到Anantara旁邊不遠嘅文苑吃晚飯，真慘情。當日係8月9日星期五，朋友話下午四點回家陪阿媽見我地，左太與朋友T媽媽交情匪淺，特登買咗一樽Dior之Poison香水去送畀T媽媽。T媽媽今年92歲咯，喜歡Poison近五十年，一直不改，可惜如今年老體弱，要由兩個工人攙扶至能起床，見到左太與Poison，即時眼睛發亮，講番幾句，但坐得十零分鐘，又要再卧在床上。我地用咗45分鐘由酒店去到吞武里，傾咗未夠半小時，朋友T家姐T醫生已講：「星期五怕塞車，要開車走嘞。」當時係5時25分，在文苑訂位係6點半，諗住實趕到，點知朋友T駕車一時貪快，話要行「沙塘橋」（香格里拉酒店旁邊）過河，唔去番往唐人街過河。咁就慘咯，過河已用咗兩個鐘頭，淨係過橋已用咗半小時，朋友T見勢色唔對，塞到Surasak就叫我地落車轉乘空鐵去St. Regis酒店站，然後行三分鐘路到文苑。卒之呢，到達文苑已係8點半，個個立即衝入廁所。朋友T位千金及Dr. T女兒女婿早已在座，呆等了兩個小時。所以話，現在曼谷樓盤來港推銷，不在地鐵或空鐵站近距離嘅，千祈咪掣，沿河一帶豪宅在吞武里那一邊嘅（即半島酒店ICONSIAM那邊），要諗過至好。唔怪得空鐵鄰近嘅豪宅（例如St. Regis一帶）特別貴，好多香港人買唔起。