689冇得做特首後，日日沉迷玩facebook抽水，久未公開露面梁唐青儀「龍蝦」夫人亦不甘寂寞，噚日真正「乜太」上身，藉奶茶評論香港政局，但講到大陸出名嘅「A貨」問題時，就突然疑似心虛口震震噃。
話奶茶唔係A貨
龍蝦噚日喺灣仔會展出席金茶王活動時話喎，奶茶本來唔係中國嘢，而係外國嘢嚟：「其實由香港殖民開始，就將呢個外國飲奶茶嘅文化，帶入咗香港」，佢話最終經過百年演變，香港人將外國奶茶「優化」，並藉此說明中國人嘅特色，就係識得將外來事物「優化」。唔知係咪知道唔少人都覺得佢口中嘅「優化」，其實即係大陸出晒名嘅「A貨」？佢台上一度煞有介事，口都震晒咁澄清：「呢個（優化）能力，嗱，我哋唔係唔係唔係……我哋唔係……呢個我哋係唔係A貨，我哋係A+貨啊！」
龍蝦跟住又突然攞住個奶茶杯，一邊搞爛gag評論近日政局：「我相信無論有啲人鍾意少糖又好，你鍾意少奶又好，飛沙走石都好，唔好飛磚掟蛋就得嘞！」有冇人，識得笑？