【本報訊】為免被秋後算賬，「唔好影相」是繼各式口號後，在抗爭現場最常聽見的一句呼喊。有抗爭者向《蘋果》投訴，指中國國安過去一年多次要求他於香港遊行示威期間，有酬拍攝參與者相片，以供中國人臉識別系統使用；近日國安再開價1.5萬人民幣要他到反送中現場拍照。
供人臉識別系統使用
化名「爆破」的投訴人去年曾到中國參與示威活動，遭國安拘留一個月，經歷疲勞轟炸式審問。獲釋當日，國安人員帶他到當地一間酒店房，聲稱該房間會是他與國安的聯絡據點，「同我講每次上去都要住返嗰度，呢間房畀咗我，就算放私人物件都得」。國安要求他回港後，按指示參與不同示威活動，並拍下參與者相片，經指定電郵傳回高質素原檔，再約時間到該酒店房內取現金酬金，「佢哋話係畀人臉識別系統用，唔一定要大頭，影到個樣就得，手機影都得」。
爆破回到香港後，多次被要求到不同遊行集會現場「開工」，包括去年7.1、10.1、今年6.4、6.9等，每次酬金由數百至數千元不等，並需留意部份重點人士如陳浩天、梁國雄等有否出席，「我冇真係影，只係喺facebook求其download啲相」。但因「工作」關係，他特別留心在場拍攝的其他人，「佢哋會係唔係都影，亂咁影，呢啲人就係同我一樣」，尤其是灣仔入境處天橋上，「特別多呢啲人，無論點鬧都會影」。
不過香港多間傳媒在這些集會均有大量相片及影片，國安為甚麼不自行下載？爆破曾有同樣疑惑，「佢哋話大陸𠵱家嚴禁翻牆，VPN block晒，國安都唔得，所以你見之前班帝吧出征全部俾人約飲茶就係咁解 」。因此回中國「交收」時，他會被國安特別委託，「要我喺香港買一堆七日太空卡返去畀佢哋，我問俾大陸海關捉到點算，佢話搵佢哋就得，最多俾人扣幾個鐘」。
反送中運動爆發後，爆破多次參與抗爭，國安亦積極聯絡要求「開工」，「一開始開1,000（人民幣），我話太危險，佢話叫我開，我開到1.5萬（人民幣）佢都話冇問題」，但最終仍以人身安全為由拒絕。
訪問期間，國安主動致電爆破，他向國安訛稱翌日將有示威者包圍中聯辦，對方稱：「你就注意收集呢啲嘢（情報）就係㗎啦，唔好去現場度舂個頭埋去（參與）。」
■記者佘錦洪