八方早前報道過，上任只係一年幾嘅政府新聞處處長朱曼鈴（Cathy）將會調走，公務員事務局噚日就公佈新一輪高官調動，確認Cathy下月9日起調任郵政署署長，遠離特首辦呢個是非之地；新聞處處長同郵政署署長都屬首長級D6職級，換言之Cathy今次係平調。Cathy喺1988年6月加入政府，為官30年，好多人都知佢係前特首曾蔭權愛將，但睇嚟就唔係林鄭月娥杯茶，皆因佢接任新聞處長只係短短一年多，而AO一般每個職位通常做兩至三年，今次調動唔太尋常，官員中人都認為佢係孭咗宣傳送中條例不力呢隻黑鑊。
林鄭舊將接手
送中條例引發連串社會衝突，新聞處要肩負起向公眾解畫嘅重責，肯定唔易做，邊個接手呢個燙手山芋？一如所料，就係由教育局局長副秘書長鄭偉源（Rex）出任，佢本月29日就會升職做新聞處處長，Rex喺1989年加入政務職系，曾經喺2011年8月至2015年7月出任過發展局副秘書長（規劃及地政），係林鄭擔任發展局長時嘅下屬，睇嚟林鄭都係想搵番自己友做呢個重要職位。
至於其他高官調動，仲包括香港駐歐洲聯盟特派代表林雪麗喺下月2日出任行政長官辦公室常任秘書長；康文署署長李美嫦下月10日就調任財經事務及庫務局常任秘書長（財經事務），接替將展開退休前休假嘅黃灝玄；政府產業署署長劉明光就喺10月4日出掌康文署。
李八方