街坊A和B是兩個90後在職女子，都已大學畢業。不知是誰開始討論時事，A說：「我中立嘅，但家姐真係深黃絲，偏激到不得了，日日講『黑警死全家』，又話示威者做乜都啱，我唔同意囉。我唔反對遊行示威，但犯法就係唔啱。」
B說：「嗱，我就好理性嘅──」一聽到這句話，我馬上豎起耳朵，傳說中的「理性藍絲」終於給我遇上了！「前線有幾辛苦，大家又知唔知呢？剩係識鬧佢哋，好唔公平囉。」我有點困惑，問她：「你話前線示威者畀人鬧？」B說：「係前線警員呀，我阿哥就係。」我繼續保持微笑。
B繼續抱怨：「啲朋友成日WhatsApp畀我，都係話警察點衰，我已經淨係雙藍剔，乜都唔答㗎啦，點知隔咗幾個禮拜，佢哋都仲要喺個group度要我表態，我終於忍唔住答『你哋好冇理性』，結果就畀人狂鬧。呢個世界仲講唔講理㗎？」
我本來不打算插嘴，但呢個moment真係忍唔住：「我本身都係藍絲，支持法治，所以我都係理性中立嘅。嗱，示威者犯法，警察就已經拉咗好多，聽講有七百個，咁警察犯法，邊個拉？」B沒料到有此一問，只能報以「er……」。我乘勝追擊：「721元朗黑社會非法集結，亂打市民，有冇畀警察檢控？有，定係冇？」理性的B無語。
我見氣氛有點緊張，便微笑着問A：「你中立就好，我問你：警察犯法，係咪要繩之於法？」A說：「係吖。」「咁你支唔支持獨立調查委員會？」「你咁講，我又支持喎。」取得2比1優勢後，我再禮貌地問B：「大家講道理，你支唔支持？」B說：「阿哥話佢哋執緊法，如果調查，就令佢哋執唔到法。」我說：「警察就永遠都執緊法㗎啦，照咁講，豈不是等警隊解散咗先可以調查？學生犯大錯都會罰停學，佢又可唔可以話：『我依家讀緊書，你罰我停學，咁點讀書？』」
B：「er……警察都唔一定有犯法，啲人係咁講之嘛。」我長嘆一口氣，說：「咪就係要還冇犯法嘅警察一個公道囉！嗱，我就好理性嘅，你呢？」理性的B沉默了。