容祖兒在紅館舉行的「Pretty Crazy演唱會」，前晚已經去到第九場，請來好姊妹Twins蔡卓妍（阿Sa）與鍾欣潼（阿嬌），及好兄弟關智斌（Kenny）擔任表演嘉賓。祖兒介紹Twins出場說：「我哋一齊長大，經歷嘅唔係你哋能夠想像，我曾經喺佢哋演唱會飲大咗，真係要好信得過，好有親切感、歸屬感，我先夠膽死喺台上飲大咗。今日唔知佢哋點對我，希望錫住我啦！」
Kenny演唱會加場
阿Sa上台卻大爆料：「我哋帶咗啲大禮畀你，雖然容祖兒冇乜緋聞，你唔好以為佢冇人追，真係好多人追佢㗎！今日已經有幾個喺度。」阿嬌接住問：「你係咪想講日本嗰個？」阿Sa扮猶疑問：「係咪真係講得㗎？」祖兒馬上搶白：「唔係，掩住你哋個嘴，冇人想聽我緋聞。你試吓再講，我拎對鞋塞住你個嘴。」阿Sa反投訴：「做乜箒！我想話好多人鍾意你，但你未同人開始，就終止人哋關係……大家都好想祖兒可以搵到個好歸宿，係咪先？」祖兒認低威說：「我真係龜縮。」Twins最後都沒有爆出追求者身份，隨後三人邀請Kenny上台合唱《死性不改》，祖兒唱完歌後，問Kenny為何超興奮？Twins即代Kenny宣佈紅館騷加開一場。
撰文：葉晴