【黑鏡線索】
777字字鏗鏘咁，朗讀「光復香港，時代革命」，話係港獨嘅意思。朋友話，大家嗌口號，即如袁崇煥嗰句「掉哪媽，頂硬上」，都係振奮吓人心，未必有一致公認嘅準確意思，不妨各自表述。只不過777心中銘念港獨，就形住大家諗港獨，咁大家嗌「資訊革命」，佢都一樣可以屈你港獨。
時代革命，革走嘅，譬如可以係葉國謙之流。佢話，見啲後生，識得用Telegram同AirDrop，又成副裝備，又識得一齊去東去西，一定係有高人，當然係外國勢力高人，響背後策劃。即係如果葉國謙問人借部iPhone，問Siri「港島東大遊行幾點」，然後Siri上wiki答返佢，佢就應該會發現重大陰謀，原來幕後大台係Apple！美帝捉華為，我哋要通過逃犯條例捉返Tim Cook！
百萬人遊行後被777恥笑 叮！
時代革命，聽講，原本係叫世代革命，但係「世代」好似暗示年紀大咗就跟唔上，但其實唔理你邊個世代。人人都可以進化，跟上時代，所以改咗做時代革命。
譬如，有朋友話，大家用咗廿二年時間，成個時代，去與虎謀皮，去動之以理爭取白紙黑字承諾嘅非山寨版一國兩制，年年鳩行，結果不進反退。有一日，佢三十九度又行完百萬人遊行，望住777開記者會嘅面口，口話尊重遊行嘅自由，心中恥笑佢第N次鳩行，佢忽然好似明咗少少啲乜嘢，個腦叮嗰一聲，可以就係佢嘅時代革命。
又例如，有朋友行完返屋企，上網睇見撞玻璃，覺得好暴力，好驚恐，恐怕會破壞咗個保持咗三十年嘅世界第一最和平鳩行美譽，正所謂輸波都攞返個體育精神獎。驚恐之際，佢見到龍獅旗喺立法會飄揚，忽然之間，心中浮現一啲感覺，好似又明多咗啲乜嘢，開始關心行政暴力同程序暴力，多過打碎玻璃嘅暴力，嗰一刻，可以係佢嘅時代革命。
關心烏克蘭關心三權分立 叮！
例如，你可能係港島人，好日都唔去新界，忽然覺得要去沙田元朗認真咁行吓。或者，你從來只覺得公司裏面嘅年輕同事好難溝通，忽然間你好想坐低聽聽佢哋諗緊乜。或者，你忽然好關心警務條例，關心區域法院原來冇陪審團，關心室內放催淚彈之後點清洗，甚至上YouTube認真聽一次LMF rap popo。
又或者忽然關心，烏克蘭除咗有舒夫真高，仲有Euromaiden係乜事幹，嗰個777成日開口埋口嘅顏色革命乜東東，到底細個睇新聞每星期都重複乜板門店南韓大學生掟汽油彈所謂何事，到底梁朝偉套悲情城市呀美麗島事件呀係發生乜事，到底當大家喺英帝庇護下努力搵錢嘅時候，其他亞洲小龍嘅人民，要兼顧啲乜嘢。到底點解有三權分立，點解要有議會，點解閹割議會一定係逼人上街，點解逼司法出手做政治決定，遲早會造成爆炸。當好多人同一時間覺醒，就係時代革命。
撰文：宋漢生