任達華上月尾喺中山出席活動被狂徒施襲，腹部同手指受刀傷，先後喺中山同香港接受手術，休息一段時間後，雖然手指傷勢仍未完全康復，但日前華哥已復工到廣州參與新戲《小Q》宣傳活動。而噚日佢就同鄧小巧現身九展舉行嘅電影愛心場，華哥右手依然戴住護臂帶，不過相當精神，唔少嘉賓向佢送上慰問，大會亦安排「左右護法」保護佢，不過就冇當日喺廣州出動八十名保安咁大陣容。
肥咗磅幾
華哥喺台上分享受傷時嘅心情，佢話最困難嘅時間已過去，要向前望，同時感謝嚟自世畀各地好友同影迷嘅慰問，華哥話曾喺電影中合作嘅荷李活女星安琪蓮娜祖莉（Angelina Jolie）亦傳訊息送上問候，令佢相當感動。華哥又透露獲太太同乖女貼身照顧：「琦琦煲湯，個女就整甜品畀我食，搞到我肥咗磅幾，但佢哋就瘦晒。上星期就開始接受物理治療，預計要做半年至九個月，護手托就最少要戴十個星期。」
問到琦琦有冇擔心佢日前返廣州出席活動？華哥坦言：「佢都有啲擔心，日後北上做嘢都會加強保安，不過我依然會同人群接觸，因為要接觸先有愛。」經歷受襲，華哥更體會到家人嘅重要性，佢決定會抽多啲時間陪太太同乖女，目前佢哋喺外地度假中，自己將前往目的地會合。
撰文：馮仁昭