施政引發民怨之大可謂前無古人嘅特首林鄭月娥，由治港者變成禍港者，點知無乜反省過失，反而一味諉過於人，難怪社會不滿依舊，而佢同班子唔落台、行會不重組之際，盛傳都會有人事變動。官場流傳，上任只係一年多嘅政府新聞處處長朱曼鈴（Cathy）即將被調離現有崗位，日後應對傳媒同發佈政府訊息等工作，會由林鄭嘅愛將負責，唔通呢樣就係林鄭口中嘅新管治作風？
鄭偉源料接棒
Cathy係前特首曾蔭權愛將，喺政府做咗都有30年，去年2月底先由旅遊事務專員調去做新聞處處長。AO一般每個位都做至少兩、三年，今次Cathy做一年多就被調，事不尋常，而Cathy嘅上任黃智祖都有類似情況。黃智祖2016年7月、即係林鄭上場前一年做處長，但舊年2月、即係林鄭上場大半年就被調走，估唔到Cathy都只係捱到一年多啲，到底係同林鄭唔多夾，抑或要孭起宣傳「送中」條例不力呢隻黑鑊？真係不得而唔知，有傳佢下個崗位係喺康文署。
至於接替Cathy嘅人選，政府新聞處內部盛傳係現任教育局副秘書長鄭偉源（Rex）。Rex係喺89年加入港府，曾經擔任香港經濟貿易文化辦事處主任，更值得留意嘅係佢喺林鄭做發展局長嘅時候跟過林鄭，任發展局副秘書長，主責規劃及地政。2012年上半年，即係前特首梁振英上任前夕，做緊局長嘅林鄭義正辭嚴要打擊丁屋僭建，激到新界人紮紮跳，有次港台節目《城市論壇》討論相關問題，Rex就代表政府出席，與時任十八鄉鄉事委員會主席梁福元等嘉賓激辯。其實近年點會見到官員上《城市論壇》？可能林鄭就係睇中Rex同佢一樣咁勇武！
八方向公務員事務局求證係咪真有此事，局方只稱不評論個別公務員調職安排嘅揣測性報道。
李八方