一代荷蘭中場指揮官史奈達掛靴！繼荷蘭黃金一代成員尹佩斯同洛賓喺今夏宣佈退休，35歲嘅史奈達星期一都返去出生地，同當地球會荷甲烏德勒支簽約加入管理層，宣佈結束17年嘅精采職業生涯，數佢生涯最遺憾嘅事，可能係2010年幫國際米蘭成為三冠王、世盃領荷蘭決賽僅輸西班牙後，金球獎竟然三甲不入！
史奈達效力咗卡塔爾球會艾加拉法年半之後，星期一同烏德勒支簽約成為管理層，終於告別球場：「我勁鍾意烏德勒支呢個城市，我同球會主席關係好好，我家陣已經唔會再踢波喇，但希望有一個地方分享我嘅回憶。」
轉戰國際領軍奪三冠
作為荷蘭近年最出色嘅攻中，身高只得1米70嘅史奈達傳波技術精湛，而且左右腳都可以轟遠射重炮，踢法雖然唔算華麗，不過非常實際。史奈達七歲就加入阿積士青年軍，18歲升上一隊，19歲已經踢荷蘭大國腳；07年夏天就加盟皇家馬德里，接替碧咸着23號，同年仲有另外兩個荷蘭同鄉洛賓、德倫特一齊上「艦」，連埋射手雲尼斯達萊組成荷蘭幫，不過第一季幫皇馬衞冕西甲後，第二季就因傷踢少咗好多；09年皇馬清洗荷蘭幫，史奈達就轉投國際米蘭，喺摩連奴麾下，史奈達踢出代表作，幫國際拎到歐聯、意甲同意盃做三冠王，歐聯決賽佢交出一腳靚傳畀迪亞高米列圖開紀錄，係奪冠一大功臣。
金球獎三甲不入最慘
隨後嘅10年世盃，史奈達繼續大勇，7場世盃入5球，同洛賓、尹佩斯一齊帶領荷蘭殺入決賽，可惜決賽加時一球輸畀西班牙，但係史奈達喺16強、8強、4強3場都有波入，表現受到一致認同，但係同年金球獎三甲就落喺美斯、恩尼斯達同沙維三個巴塞隆拿球員手上，呢年史奈達嘅飲恨，成為其中一屆最大爭議性嘅金球獎。
自此之後，史奈達開始由高𥧌向下，13年已經去咗土超加拉塔沙雷，踢咗四季半後，喺法甲尼斯同卡塔爾嘅艾加拉法完成最後兩年職業生涯，埋單計數，史奈達幫荷蘭上陣過134場係橙軍歷來最多，亦都入過31球，絕對係荷蘭其中一位經典10號仔。