現年47歲的何婉盈90年代與曾航生合唱《再見亦是朋友》，風靡一時。曾為愛情放棄事業的她，婚姻失敗加上未婚產女，被迫自強，單親母親為了愛女，與女兒生父多年來都保持良好關係，原來「再見亦是朋友」正是她的寫照。
何婉盈91年參加港姐入行，之後拍劇又做司儀，92年簽華納做歌手，發展不俗。不過愛情方面，前半生卻錯愛三次，96年與無綫小生魏駿傑分手後，遭對方向傳媒呻爆拍拖三年來沒性生活，2001年她退出嫁富二代傅大全，但婚姻一年多就玩完。2007年她為男友未婚生女，女兒出生後兩人同居兩年，但最終因性格不合分手，但兩人因女兒關係依然有偈傾。何婉盈說：「其實分手後只能做普通朋友，同囡囡嘅爸爸算係有商有量，佢事業忙又有自己家庭同囝囝，所以囡囡嘅事佢都尊重我決定，尤其學業安排，我哋溝通都OK，個女12歲，好多嘢佢會自己同老竇講。」
男友相處融洽
單親家庭長大的何婉盈，15歲時父母離異，變成兩人磨心，令其成長路產生很多不信任及懷疑，為免囡囡重蹈覆轍，她會將自己過往的錯誤作為女兒的借鏡︰「我會將我人生中錯誤，坦白向佢交代，再隔十年，同佢講多一次，因為怕佢年紀細未入腦，嗰陣父母分開後，唔會直接對話，我變咗傳聲筒，好辛苦。令我深深感受到，就算分開都唔好喺細路面前講對方壞話，小朋友冇義務聽你哋大人打毒針。」
與女兒生父分手後，何婉盈單身很久︰「嗰陣會慨嘆自己遇唔到好人，後嚟終於明白，我自己想法太完美，每個人性格都唔同，要互相遷就、磨合。」去年認識現任男友，兩人一見如故，現已拍拖半年，最初何婉盈擔心女兒不接受，幸好相處後很融洽︰「我第一次帶男朋友畀佢見，會審慎啲，怕影響佢成長。初時都驚個女亂諗，佢以為有人搶走我，成日問『媽咪你愛唔愛我？』佢𠵱家明白咗，加上uncle對佢幾好，佢至安心。」
復出再戰樂壇
何婉盈近年積極復出，之前因音樂節目與歌手黃翊及黃寶欣等結緣，下月一齊開演唱會，她說︰「二十出頭時唱歌雞仔聲啲，不過隨住年齡、心態轉變，把聲厚咗，希望嚟緊可以開小型個人音樂會。」
撰文︰祖李
攝影︰陳慧安
場地提供︰如心艾朗酒店