周日法甲班霸巴黎聖日耳門（PSG）展開衞冕之路，第一戰主場面對尼姆，靠卡雲尼、基利安麥巴比同迪馬利亞各建一功，以3:0大勝對手旗開得勝。不過對比場波，更多人關注嘅係主隊球迷點樣「招呼」打算離隊嘅尼馬。咁佢哋又唔係克警，所以只係掛橫額叫尼馬快啲走，同埋全場不停唱粗口歌，睇嚟呢位昔日寵兒家陣已經變成過街老鼠。
印橫額粗口歌問候
周日一戰，尼馬因為有傷在身，加上球隊總監李安納度已證實球隊就尼馬轉會展開咗談判，所以首場冇入大軍名單。PSG今場繼續有麥巴比同卡雲尼擔正，24分鐘卡雲尼就主射12碼命中，為球隊先開紀錄。踢到56分鐘，PSG有麥巴比近門抽射增添比數，13分鐘後再由後備入替嘅迪馬利亞接應麥巴比傳送埋齋，以3:0大勝尼姆響頭炮。
但係對比戰情，場外嘅PSG球迷種種「反尼馬」嘅示威就更加矚目。一批球迷已經準備好「尼馬滾蛋！」，同埋諷刺尼馬之前涉姦嘅橫額。開波之後，都有唔少球迷唱帶有粗口嘅歌曲侮辱尼馬，更有指有激進球迷印咗點樣喺場內攻擊尼馬嘅手冊，仲將佢稱為「球隊史上最令人噁心嘅球員」，昔日重金加盟嘅寵兒終於走下神壇。
杜曹麥巴比護航
不過你有你抗議，但隊內上下接受傳媒訪問嗰陣都仲係好支持尼馬。教練杜曹被問及有冇聽到球迷針對尼馬嘅口號同歌聲時，呢位德國教練都嘆咗口氣話︰「我都唔知應該講咩，我知道有啲球迷唔妥尼馬，比賽期間我都聽到。我理解球迷嘅心情，但同時我都唔理解，因為佢仲係球隊一員，仲係更衣室嘅一分子，我知道唔係所有人都鍾意尼馬，但都請大家用合適嘅言辭表達感受。」但同時，杜曹都已經表示要搵定冇尼馬嘅解決方案，睇嚟已經露出一啲端倪。至於尼馬好兄弟麥巴比都表示，希望呢位巴西前鋒可以留隊︰「我唔會吹水，球隊踢成點真係要睇尼馬嘅情況，冇尼馬，我哋會係另一隊唔同嘅球隊，不過我哋一班球員仍然會為球迷努力。」