7.28上環衝突路過現場嘅情侶湯偉雄同杜依蘭，就咁無辜被控暴動罪，呢對「亂世情侶」，本月4號已經註冊成婚，唔少參與逆權運動嘅朋友專程到賀。因暴動罪被判囚七年嘅盧建民（影攝食），喺監獄親繪咗張賀卡，託八方送畀呢對新婚夫婦，祝兩人「天地長久，永不分離」，亦祈願律政司會對兩人撤控。
嘆被「新獅子山精神」取代
盧建民喺賀卡入面，大讚兩人當日救助他人嘅行為，表現出人性嘅光輝，示範喺危難之中互相扶助嘅獅子山精神，仲話佢哋兩個冇做錯到，錯嘅只係呢個麻木不仁嘅政權同肆意使用暴力嘅警察。
八方收到賀卡，拿拿臨轉送畀湯氏伉儷，佢哋亦好快用新外號「赴湯杜火」寫咗封回信畀盧建民，多謝佢嘅祝福同關心，仲話好鍾意信中提到嘅獅子山精神，但就有一番感言：「但自回歸以來，我哋被新獅子山精神取代，大部份價值只在於有幾多金錢、利益」，結果令香港人生活壓力越嚟越大，仲兼顧唔到其他事，變得越嚟越冷漠。
不過，「赴湯杜火」叫盧建民放心，因為自從逆權運動，呢啲互助互愛精神已經慢慢出現番，佢哋都希望好快有一日香港可以回復原貌，仲約定到時大家可以喺立法會煲底舉杯同歡。
李八方