特區政府堅拒接納市民五大訴求，反修例運動持續，被唔少網民認定係紅媒嘅大台無綫電視都受針對。八方聽聞，cctvb新聞部喺反修例浪潮下出現逃亡潮，約逾三分一前線記者已經遞信辭職，唔知係不滿大台嘅報道方針或手法、抑或覺得用大台身份去採訪好有壓力？遞咗信準備走人，據知亦包括前晚喺銅鑼灣示威現場採訪期間，喺出現疑似警察扮示威者、混入人群捉黑衣人時，上前質問疑似便衣警「係咪阿Sir？」嘅張家灝。
張家灝早前已遞信
fb專頁Pokemon GO HK嘅版主噚日都開po報道張家灝辭職嘅消息，仲讚對方多次喺記者會上問得好，包括質問過特首林鄭，「例如『係咪撤回呢兩個字唯獨唔可以出自你把口呢？』」據知，張家灝較早前已遞信辭職，八方向佢查詢，佢話不便回應。
聽講近日辭職嘅8人全部都係前線記者，絕大部份仲係已有幾年經驗嘅記者，但唔包括近日因其他原因離職嘅前女主播金盈。前線記者真係唔易做，呢排頻頻因為採訪食催淚彈，仲要被警方無理對待，緊守崗位嘅時候，又要畀示威者指罵，都咪話唔心灰意冷。大家加油嘞。
