香港呢個小小嘅地方，近期因為特首林鄭月娥搞出嚟嘅「送中」惡法，聞名國際，全球各地都睇到，反修例嘅港人，幾咁有毅力，但與此同時都有啲人令香港蒙污。日本朝日放送電視台每周六播放嘅節目，喺本月3日專題講述香港7.21元朗恐襲中，白衣人無差別打人事件時，除咗引述外界質疑係三合會黑幫成員所為，仲提及曾與白衣人擊掌嘅立法會議員何君堯，涉嫌勾結黑幫打人，名副其實醜出國際。
網民：推上TIME
呢集節目搵嚟熟悉香港情況嘅日本記者福島香織分析事件。佢話利用黑幫鎮壓係中國共產黨常用手段，又提到香港立法會親北京嘅議員何君堯喺7月21日元朗暴力事件發生前兩小時，被拍到喺元朗同多名白衣男握手，仲稱讚白衣男「你哋係我嘅英雄」，何君堯亦承認當晚同白衣人食飯㖭。當然啦，何君堯話要將香港獨立派「殺無赦」嘅成名金句，喺節目中都有被提及，真係當堂成個人立體晒。節目同時介紹香港人口約750萬人，三合會成員就有約10萬人，相比日本2018年數據就顯示，暴力團體成員只有約3萬人；而香港警察數據則指2018年涉及三合會嘅事件有多達1,715宗。
唔少網民都好關注呢個報道，對於何君堯「蜚聲國際」真係熱烈地彈琴熱烈地唱，Jason Chan就話嘞，「連日本都證明何君妖係黑社會。真係做國際風雲人物。不如推埋上美國Time咁就臭名遠播」；Ginni Chan就覺得，「應該全球嘅電視節目都要播出，畀世人知道，林鄭政府同香港警察已經黑晒」，另有網民建議日本唔好畀呢個危險人物入境喎。
李八方